Состојбата на човековите права и слободи во Македонија е лоша. Дискриминацијата и кршењето на овие права се масовни и сеприсутни во сите сфери. Работењето на терен покажа дека постои голем страв кај луѓето да проговорат за тоа што им се случува.
Ова е дел од извештајот на Цивил – Центар за слобода, во најновиот извештај во однос на состојбата со човековите права и слободи во Македонија, кој беше презентиран во паркот „Жена борец“ пред стотина граѓани и активисти за човекови права.
Претседателот на Цивил, Џабир Дерала посочи неколку препораки кои се издвоени во извештајот а според кои треба да се поправи ситуацијата во Македонија во однос на ова прашање.
– Забележлива е недовербата кај граѓаните и граѓанките во иституциите и убедеувањето дека тие што се на одговорни позиции настапуваат од позиција на моќ и се потполно неказниви и недопирливи. Институциите на локално и централно ниво се најодговорни за оваа состојба поради политизираноста од кои последица се погрешните политики и практики, рече Дерала, посочувајќи дека тоа што освен 2-3 пратеници од сите кои биле поканети директно да го подигнат извештајот, зборува за заинтересираноста кај политичарите за човековите права на граѓаните.
Активист Петрит Сарачини рече дека системот си наумил да ја тера својата работа, но дека без поддршка на граѓаните, борбата за подобро утре не може да успее.
– Луѓе, ние сме навистина изморени, не само од повторно констатирање на состојбите, туку сме изморени истите луѓе да ја биеме оваа битка за вас. Не можеме да ја биеме успешно ако не ни се приклучите…Нема чаре ако не излеземе сите и ако не застанеме зад чарето…Затоа граѓани, вклучете се во оваа игра, за да не не играат – порача Сарачини.
Јасмина Голубовска од Хелсиншкиот комитет за човекови права рече дека состојбата е без подобрување.
– Се надевам дека ќе посакаме подобро утре за сите граѓани, зашто ништо не е поважно во државата од граѓаните, ниту партиите, ниту лидерите, ниту пратениците, никој не е побитен од граѓаните – рече во своето обраќање Голубовска.
Во извештајот пишува дека се регистрирани два случаи во кои се врши дискриминација по основ на возраст во Скопје и во Охрид, во кои на кандидати за вработување на над 40-годишна возраст им било кажано дека се престари за работа. Цивил констатира и дека постапките за прием на работно место се крајно проблематични, исплатата на личните доходи е често пати во готово, а граѓаните може да добијат отказ во кое било време без образложение и без особена причина.
Во графата за дискриминација врз основа на политичка афилијација пак, пишува дека во Скопје, Велес, Битола и Кавадарци присутно е т.н. етикетирање на тие родители кои само се поздравуваат или се во добри односи со „обележаните“ наставници, приврзаници или членови на опозициските партии.