Алијансата за позитивна Македонија ги повикува лидерите на двете партии кои, вели партијата, ја имаат „привилегијата“ да преговараат и да одлучуваат за судбината на Македонија и нејзините граѓани, да изнајдат компромис во решавањето на досега најголемата политичката криза во историјата на Република Македонија.
– Со ваквиот начин на одоговлекување на решението на кризата, граѓаните на Македонија се држат во еден вид на заложништво на патот кон евро-атланските интеграции и сериозно се загрозува кандидатскиот статус, како и препораката за започнување на преговорите за членство во ЕУ, смета АПМ.
Оттаму велат, извештајот на ЕУ од минатиот месец, извештајот на Стејт Департаментот на САД, како и другите извештаи на релевантните меѓународни институции кажуваат дека Република Македонија сериозно се оддалечила од Копенхашките критериуми.
– Двете партии ВМРО-ДПМНЕ и СДСМ, кои според најновата анкета на ИРИ, заедно не ја уживаат поддршката ниту на 35% од граѓаните на Македонија, но ја имаат „привилегијата“ да одлучуваат за сите граѓани поради недемократскиот изборен модел, немаат никакво право да се подигруваат со стекнатите вредности на Република Македонија кон евро-атланските интеграции, само поради заштита на теснопартиските или личните интереси на поединци, се вели во соопштението на АПМ.
АПМ апелира до ЕУ и САД поинтензивно да се заложат кон решавањето на политичката и уставната криза во Македонија која веќе предолго трае, а жртви се сите граѓани на Република Македонија.