Растат вербалните напади и обвинувања на релација власт- опозиција на два дена пред четврточното гласање (не)доверба на Владата. Додека се пребројуваат и едните и другите и работат на окрупнување на сопственото мнозинство, се поприсутни се и обвинувањата за уцени, притисоци па дури и за непристојни предлози врз оние избраници чиј глас во зависност од политичката поставеност во парламентот, значи многу во даденава ситуација.
Го контактиравме пратеникот Љупчо Пренџов од ГРОМ, кој два дена говори за притисоци врз колегите.
– Лично немам притисоци, но самото присуство на премиерот во 19, 20 , 21 часот во Законодавниот дом е облик на притисок, не е дозволиво и е вон демократија, наместо да се бави со тоа, би му порачал да си ја даде оставката. Човек кој не може да си ја изменаџира оставката која сам ја соопшти а еве веќе поминаа 8 дена, тој не може да ја менаџира енергетската криза во која е влезена државава како и останатите предизвици со кои се соочува земјава, изјави за Нова ТВ Љупчо Пренџов пратеник од ГРОМ, партија која е дел од опозициската коалиција.
За разлика од Пренџов , колешката од мнозинството, пратеничката од СДСМ, Снежана Калевска Ванчева со доза на сарказам вели дека не ни има пратеници во Собранието за некој да им врши притисок.
– Апсолутна небулоза , се тврдењата на дел од опозициските пратеници дека биле под притисок , уцени , закани или непристојни предлози , пред гласањето (не) доверба на Владата во четврток. Не им е прв пат да се служат со вакви дезинформации а најодговорно тврдам дека ниту имало, ниту има , ниту ќе има притисоци од вид за кој зборуваат опозициските пратеници, зашто тоа не е наш начин на дејствување. Прво, видете што изјавува пратеникот Реџепи и тоа доволно кажува кој, кому врши притисок. А во Собранието ниту има пратеници за да им се врши притисок, секој кој бил деновиве во Собрание може да се увери само колку пратеници има, вели во разговор за НоваТв пратеничката од СДСМ , Снежана Калевска Ванчева .
Утре се очекува Алтернатива, како што самите најавија, да излезе со финален став за тоа како ќе гласа на иницијативата за доверба на Владата, Нејзиниот пратеник Скендер Реџепи деновиве,а особено синоќа во телевизиски настап децидно порача дека неговиот потпис нема да дозволи да стои до потписот на Апасиев,ако партијата е решена да го руши Заев и актуелното мнозинство со Левица на списокот. Реџепи дури рече дека размислува или да ја напушти Алтерантива или да го врати пратеничкиот мандат.
Во меѓувреме СДСМ деновиве излегува со соопштенија во кои се наведува дека мнозинството за кое деновиве зборуваат од ВМРО-ДПМНЕ, Алтернатива, Алијанса, БЕСА и Левица не ќе да е мнозинство.
– Расте нервозата во ВМРО-ДПМНЕ откако станува јасно дека на Христијан Мицкоски му испарува мнозинството во Собранието, па затоа денеска од белиот дворец се обидуваат да најдат алиби во наводни закани кон пратеници.
Пратеници од опозицијата самите признаваат дека потписите за иницијативата за недоверба на Владата се собрани преку меѓусебни лаги и измами. Граѓаните не забораваат дека токму ВМРО-ДПМНЕ и нејзини високи функционери се закануваа кон пратеници кои гласаа за уставните измени и очигледно дека тоа ВМРО-ДПМНЕ сака да го направи и денес. Пратениците да бидат спокојни, државата, институциите ќе ги заштитат од заканите на ВМРО-ДПМНЕ, обидите за закани и притисоци нема да им успеат“, се наведува во реакцијата од СДСМ.