Агенцијата за аудио и аудиовизуелни медиумски услуги ќе почне постапка за одземање на концесијата на Радио Слободна Македонија.
Во Извештајот што е објавен на интернет страницата на АВМУ од контролата во Трговското радиодифузно друштво Радио Слободна Македонија ДООЕЛ Скопје било утврдено дека не се исполнети минималните кадровски услови утврдени со Правилникот за минимални технички, просторни, финансики и кадровски услови за добивање дозвола за радио и телевизиско емитување.
Поради ова, од директорот на Агенцијата се бара да достави предлог до Советот за покренување постапка за одземање на дозволата за радио емитување.
Во Радиото е вработено само едно лице на неопределено време. Останатите девет договори на дело, кои биле поднесени до Агенцијата пред еден месец, биле со важност до 11 април. Радиодифузерот не доставил документи со кои би се утврдило дека по овој датум, Радиото ги исполнува минималните кадровски услови. Според членот 9 од Правилникот за минимални услови за добивање на дозвола за радио емитување бројот на вработени треба да биде десет, од кои тројца со ВСС, вработени како новинари.
„Имајќи го предвид констатираното прекршување на член 62 став 6 од Законот за аудио и аудиовизуелни медиумски услуги, според кој за „обезбедување на телевизиско или радио емитување покрај условите и обврските пропишани во овој закон, радиодифузерот треба да исполнува посебни минимални, технички, просторни, финансиски и кадровски услови во зависност од програмскиот формат, а согласно член 82 од Законот за аудио и аудиовизуелни медиумски услуги, согласно кој – Агенцијата ќе ја одземе дозволата за телевизиско или радио емитување пред истекот на рокот за којшто е издадена и ќе го избрише радиодифузерот од регистерот доколку настанат околности што претставуваат законски пречки за имателот на дозволата да ја врши дејноста, се бара мерка одземње на дозволата за радио емитување.
Радиото Слободна Македонија со месеци не емитува програма во живо.
Сопственик на Радио Слободна Македонија е фирмата НВСП, чиј газда е Владислав Стајковиќ. Фирмата НВСП се појавуваше во прислушуваните разговори, кога се слушаше гласот на поранешниот директор на УБК Сашо Мијалков како договара милионски провизии со Израелците за набавка на опрема за прислушување. Според аудио снимките на опозицијата, дел од парите требале да легнат на сметката на НВСП.
Инаку, Владислав Стајковиќ е брат на поранешниот помошник-министер во МВР, Небојша Стајковиќ, кој е обвинет во случајот „Трезор“ на Специјалното јавно обвинителство, заедно со Мијалков, поранешниот шеф на неговиот кабинет, Тони Јакимовски и екс началникот на петтата управа, Горан Грујевски.
Радиото Слободна Македонија почна со работа во декември 2013 година и од тогаш беше медиум кој отворено ја подржуваше тогашната власт. На сметка на радиото се слеваа илјадници евра, а свои емиси имаа гласните подржувачи на политиката на ВМРО ДПМНЕ: Миленко Неделковски,Јанко Илковски, Ацо Станковски, Тања Каракамишева, Ристо Никовски, Тони Михајловски но и новинари од владините телевизии Славица Арсовска, Наташа Мерсовска, Иван Мирчевски.
Газдата на Радио Слободна Македонија Стајковиќ беше член и на Надзорниот одбор на Државна видеолотарија, а преку НВСП и прв газда на фирмата за обезбедување имот и лица СГС и прв газда на скопската компанија „Финзи“ која пак го поседуваше интернет-порталот „Нетпрес“.