Министерот за надворешни работи на Република Македонија, Никола Попоски, по денешната средба со неговиот австриски колега, Себастијан Курц, рече дека во 2016 година низ Македонија ќе транзитираат стриктно толку бегалци колку што земјите од ЕУ официјално ќе примаат, на зајакната граница со соодветен легален премин.
Имено како што соопшти Попоски, за оваа цел, сите транзитни земји зафатени со бегалската криза координирано ќе постапуваат, за што потврди и Курц, потенцирајќи дека неговата рута низ Западен Балкан е токму поради тоа.
– За таа цел, Македонија ја поздравува финансиската помош, бидејќи до сега целиот трошок за справување со кризата беше врз грбот на македонските даночни обврзници, рече Попоски.
Курц додаде дека во 2016 година, Австрија ќе го достигне лимитираниот број на прифаќање на бегалци, кој е определен на околу 37.000 и дека потоа ќе ја затвори својата граница, а како помош за земјите кои ќе бидат погодени од тоа, меѓу кои и Македонија, ќе испратат свој полициски и воен персонал кој ќе работи под директива на македонските власти.
– Австрија е една од трите земји, со Германија и со Шведска, во кои најмногу се примаат бегалци. Нашите одлуки ќе имаат последици кон земјите од балканската рута, Словенија, Хрватска, Србија и Македонија, изјави Курц, додавајќи дека Македонија ќе мора целосно да го сопре бранот на бегалци.
Одговарајќи на новинарско прашање, дали во ЕУ се разгледува можноста за бегалски кампови во Македонија, австрискиот Министер за надворешни работи потенцираше дека не се исклучува можноста за отворање на прифатни центри, во кои, бегалците кои нема да можат да стигнат до земјите од ЕУ, ќе мора привремено да чекаат овде.
Министрите на средбата разговарале и за политичката криза во Македонија како и неопходноста за обезбедување слободни и демократски избори.
Рече дека Австрија би можела да испрати набљудувачи на изборите.
Попоски и Курц денеска потпишаа акционен план со кој се предвидува подобрување на економската соработка, помош во форма на обуки на млади дипломати и модернизација на јавната администрација.