Три години компанијата „Беса Транс“ го поседувала автобусот кој изгоре на автопатот „Струма“ во Бугарија, во кој загинаа 45 граѓани. Автобусот бил произведен во 2007 година, а сите контроли покажале дека тој бил исправен, тврди газдата на „Беса Транс“ Беким Хаџиу, кој во интервју за БНТ, рече дека останува во Бугарија за да биде достапен на органите кои ја водат истрага за несреќата.
Автобусот помина на технички преглед пред да замине од Турција и сè беше во ред, тврди газдата на „Беса Транс“, Беким Хаџиу во интервју за Бугарската национална телевизија, прва негова изјава за медиум по трагедијата во која загинаа 45 луѓе, а седум патници беа повредени. Според Хаџиу, пред секое патување автобусте на „Беса Транс“ поминувале на сервисна проверка.
– Пред да тргнеме за Турција ги сервисираме, контролираме, па дури и кога ќе стигнеме до Истанбул и таму одиме на сервис да ни ги проверат автобусите, бидејќи превезуваме патници, да видиме каква е состојбата. Сè беше во ред таму, тврди Хаџиу.
Тој кажа дека со неговото семејство биле дел од патувањето, со друг автобус.
Изгорениот автобус на „Беса Транс“ бил произведен во 2007 година, а компанијата го купила како половно возило пред три години. Досега овој автобус, Хаџиу вели дека немал технички проблеми, кој опишува дека му е тешко да ја прифати трагедијата на автопатот „Струма“ во Бугарија.
– Си велев зошто не сум во овој автобус, да умрам во автобус и тоа си го кажав многу пати, рече Хаџиу.
Тој кажа дека на границата меѓу Бугарија и Македонија дознал дека еден од автобусите излетал на автопатот „Струма“ и се вратил на местото на несреќата.
Хаџиу рече дека тој се возел во првиот автобус, заедно со неговата сопруга, додека неговите деца се превезувале во последниот од вкупно четирите автобуса.
Хаџиу во интервјуто за БНТ, говори и за возачите на автобуси на „Беса Транс“. Тој кажа дека тие се искусни професионалци кои многупати ја поминале релацијата и ги почитувале часовите за пауза. Според Хаџиу, автобусот имал фабрички ограничувања и не можел да вози повеќе од 100 km/h. На прашањето дали автобусот ги има сите потребни документи, Хаџиу ова не сакаше да го коментира поради отворената истрага во Бугарија, за која, како што рече, токму поради неа останува во оваа земја во која изнајмил стан.
– Никој не сакаше ова да се случи. Сите го знаат тоа. Не дозволувајте никому да му се случи оваа трагедија, тажна, многу тажна трагедија. Не знам што друго да кажам, изјави за БНТ сопственикот на Беса транс.
„Беса Транс“ е основана во 2009 година. Оваа компанија четири години е редовен превозник до Истанбул.