По 22-ри пат, православните верници во Скопје, бадникуваа пред Соборниот храм. Свештениците ги осветија и поделија бадниковите гранчиња, нафората, чајот и ракијата.
Симболичното примопредавање на кумството го изврши поглаварот на МПЦ-ОА, г.г. Стефан, кој традиционално се обрати и пред насобраните.
– Божик најдобро ќе го обележиме ако покажеме дека нашето срце е подготвено да го прими во себе и да биде и пештера и јасли за богомладенецот, ако покажеме дека Бадник ни е секој ден и дека Бог постојано се раѓа во нашите души, порача г.г. Стефан.
Во обраќањето пред собраните верници г.г.Стефан честитајќи им го празникот, го истакна значењето на Бадник како голем христијански празник, кој веќе 20 столетија ја содржи тајната на богораѓањето, празник од кој, вели, извира постојана радост, поради објавата на Христовото раѓање во Витлеем.
Новиот кум бадникар, Методија Стефановски – Тоде, кој е дел од манифестацијата од нејзиното основање, истакна дека кумството го прифаќа како голема чест, но и голема награда што еден скопјанец-христијанин може да ја доживее.
– Нема сопствена среќа ако другите се несреќни. Нема поголема радост ако е радост за сите. Бидете здрави, среќни и успешни. Радувајте се на животот и на нашите христијански празници и обичаи, рече Стефановски.
Стариот кум пак, бизнисменот Даниел Воиновски рече дека изминатата 2013 година била среќна за него на личен и професионален план.
Скопското бадникување пред Соборниот храм го започна и одржува Здружението на граѓани – Одбор за традиционална прослава на Бадник. Манифестацијата ја поддржува и градот Скопје.
Средбата заврши симболично со пајтон, на кој новиот кум-бадникар, заедно со ќупот и семејството замина од пред платото на Соборниот храм во музичка придружба.