Бакрачевски изјави дека ќе ја почитува одлуката на директорката која по систематизација го распоредила за раководител на одделот за аритмија. Но смета дека треба да работи таму каде што може најмногу да помогне како интервентен кардиолог
На Никола Бакрачевски, поранешниот градоначалник на Охрид денеска му бил одземен и кабинетот, односно работната соба со која располагал како лекар во Заводот за кардиологија во Охрид. Ова за НОВА го потврди Бакрачевски кој потенцира дека ова e направено тенденциозно, исто како и неговото назначување на друг оддел кој не соодвествува со неговата стручност како интервентен кардиолог. Тој смета дека зад ова не стои партијата СДСМ, туку поранешен директор на Заводот, сега пензионер кој котира високо во партијата.
„Денеска ми беше одземена и работна соба, а претходно од таму ми се одземени компјутерот и принтерот. Вистината е дека сум распореден како раководител на одделот за аритмија, но јас како интервентен кардиолог најмногу можам да помогнам таму каде што сум најстручен. Сето ова е тенденциозно направено, но зад ова не стои СДСМ туку поранешен директор, сега пензионер и висок партиски активист кој е секој ден присутен во Заводот“, изјави за НОВА Бакрачевски.
„Тој нагласи дека нема да се противи на одлуката на директорката да работи на одделот за аритмии и ќе ја почитува оваа одлука. Бакрачевски објаснува дека откако ја напушти градоначалничката фотелја земал една недела одмор и вчера на првиот работен ден разбрал дека по систематизација е распореден за раководител на одделот за аритмии што не одговара за неговата стручност.
„Ја сум основач на интервентната кардиологија и очекувам да бидам таму. Сепак, не можам да се мешам во одлуката на директорката и јас како професионалец ќе ја почитувам. На утринскиот состанок не ми беше прецизирано што ќе работам и дали ќе работам интервенции за кои сум стручен“, рече Бакрачевски.
Тој нагласи дека освен него оваа процедура ја работат уште тројца лекари, еден кардиолог и двајца интернисти кои одлично си ја знаат работата, но се негови ученици. Со интервентната кардиологија започна пред 11 години, веднаш откако почна да се работи на Клиниката за кардиологија во Скопје.
Директорката на Заводот за кариологија во Охрид, Гордана Донева не беше достапна да одговори што се случува и дали планира доктор Бакрачевски да го вклучи во тимот кои работи интервентна кардиологија.
Денеска таму била испратена екипа од Државниот санитарен и здравствен инспекторат да испитаат што се случува и дали е прекршен законот.
„Констатирано е дека докторот е распределен на оддел за аритмија кој што одговара на неговата стручност и дека нема повреди на законот во однос на неговото распоредување. Сепак, од дневникот на Заводот забележавме дека Бакрачевски вчера вршел коронарографија на пациент и никој не му го забранил тоа“, изјави за НОВА Ирина Сотирова Бухова директорка на ДСЗИ.
Таа нагласи дека утре продолжува инспекцискиот надзор и за останатите вработени дали се распоредени според нивната стручна подготовка за да се расчистат шпекулациите кои кружат во јавноста.