Асоцијацијата за детски дијабет на Македонија – Баланс МК, бара од Агенцијата за лекови итна детална проверка и вонредна инспекциска контрола по однос на набавка, транспорт и чување на инсулините во Македонија. Тие веќе оствариле средба со директорот Роберт Бекировски на кого му изнеле долгогодишните проблеми со инсулините.
„Со оглед на зачестената појава на “нефункционалност“ на инсулините во изминативе три години, особено во периодите август – ноември, Асоцијајацијата за детски дијабетес Баланс МК, како и мнозинството други здруженија на дијабетичари изразуваат отворен сомнеж во квалитетот на набавка, транспорт и складиштење на инсулините што фирмите набавувачи (“Зегин“, “Елбиор“, “Пановски“, “Фарматрејд“ и “Феникс“), како и фирмите складиштари и транспортери, кои им ги нудат за користење на лицата со дијабетес во Република Македонија. Станува збор за 40.000 лица инсулин-зависни во државата.
Во тој смисол, Баланс МК бара од Агенцијата за лекови при Министерството за здравство на РМ, согласно постоечките законски прописи кои децидно ги нормираат условите за набавка, транспорт и чување на лековите (во конкретниот случај – инсулинот), да се извршат ИТНО детални проверки и вонредни инспекциски контроли по однос на следните точки:
– Проверка од каде се набавува инсулинот и, да се обезбеди гаранција дека инсулинот бил соодветно чуван до моментот на превземање од страна на увозниците;
– Проверка на на сите температурни исписи од дата-логери во рамки на т.н. студен ланец на транспорт;
– Проверка на температурни записи на складиштење на овој лек со компаративна проверка согласно законската обврска на чување и документирање на температурни записи во изминатиот неколкугодишен период (5 години според Законските прописи и регулативи).
Асоцијацијата за детски дијабет на Македонија – Баланс МК, која ги застапува правата на речиси 5.000 лица и деца со дијабетес тип 1, како директно засегната од квалтитетот и начините на набавка, транспорт и чување на инсулините, исто така, бара од Агенцијата за лекови да овозможи при изведувањето на бараните контроли присуство и на свој претставник со цел конечно демистифицирање на оваа појава“, се вели во барањето на Баланс МК, упатено до Агенцијата за лекови.
Во Македонија има околу 180 000 луѓе со дијабетес, од кои 40 000 се зависни од инсулин. Тие во изминатите години освен со честиот недостиг на инсулини, се соочуваа со пад на квалитетот при што поголем дел од пациентиоте тврдат дека инсулините не делуваат како што треба.