По повод светскиот ден за борба против аутизам, првиот човек на Обединетите нации, Бан Ки-мун повика на образование, вработувања и интеграција на сите луѓе со аутизам.
Тој нагласи дека аутизмот е доживотна попреченост, која најчесто се манифестира во првите три години од животот.
„Светскиот ден на аутизмот е шанса да се прослави креативниот ум на лицата со аутистични спектрални нарушувања и да се обнови нашата посветеност да им помогнеме да го реализираат својот огромен потенцијал. Нивната сила инспирира. Тие ги заслужуваат сите можности за образование, вработување и интеграција“, порача генералниот секретар на ОН.
Одбележувањето на овој ден се прави по седми пат откако во 2007 Генералното собрание на Обединетите Нации ја усвои резолуцијата за одбележување на овој ден. Темата на меѓународниот ден на аутизмот е „Разбирање и прифаќање на лицата со аутизам“.
Меѓународниот ден на аутизмот, меѓу другото, има за цел да посочи на важноста за рано откривање и рана интервенција, како и потребата од разбирање на овие лица.
Во Македонија денеска се организираат низа активности. Здружението „Во мојот свет“ почнува кампања под мотото „Еден свет за сите“ која ќе се одвива во текот на цел месец, а централниот настан ќе се одржи попладне во Скопје сити мол. Македонското-научно здружениe за аутизам пак, денот ќе го одбележи со неколу настапи во Музејот на македонската борба.
Сепак, во многу земји во светот, лицата со аутизам сеуште се соочуваат со дискриминација и исклученост. Дури и онаму каде што нивните права се заштитени со закон, тие често мора да се борат за да дојдат до основни услуги.