Банките лани одобриле 400 милиони евра нови кредити, а примиле депозити од 300 милиони евра, покажуваат податоците на Народна банка на Македонија за 2015 година.
Вкупните кредити издадени на граѓаните од 1,6 милијарда евра во септември 2014 година се зголемиле на 1,8 милијарда евра во септември, минатата година, што е пораст за околу 200 милиони евра за една година.
Според овие податоци, секој граѓанин во земјава во просек им должи по 900 евра на банките, а најголем пораст има кај потрошувачките кредити.
Народна банка од почетокот на годинава воведе мерки за ограничување на потрошувачките кредити, со оглед што лани бил забележан голем раст кај овие заеми.
Компаниите лани добиле вкупно нови кредити од банките од 169 милиони евра, а најголем дел од нив, 89 милиони евра, биле одобрени во декември.
Лани во декември вкупните депозити од граѓаните и компаниите биле 4,95 милијарди евра (што е пораст за 301 милион евра за период од една година), а долгот на граѓаните и фирмите кон банките е 4,55 милијарди евра. Или за една година вкупното кредитирање се зголемило за 395 милиони евра.
Депозитите на фирмите се зголемиле за 107 милиони евра и сега се на ниво од 1,17 милијарди евра.