Американскиот претседател Барак Обама на своето годишно обраќање ги објави како што ги нарекува “конкретните и практични предлози” за да се намали јазот помеѓу богатите и сиромашните. Обама сака 2014-та да биде година на акција.
Обама изјави дека ќе го заобиколи американскиот Конгрес во ситуацииите кога ќе може да преземе чекори без законодавство, со цел да ги прошири економските можности за средната класа американски семејства.
– За неколку недели, јас ќе потпишам извршна наредба со која ќе побарам од сите компании кои работат со централната Влада да им исплаќаат минимална плата од 10 долари и 10 центи по час на свотие вработени. Бидејќи ако готвите за нашите војници или им ги миете чиниите, не треба да живеете во сиромаштија. Приклучете и се на државата. Кажете да. Дајте и повисоки плати на Америка, изјави Обама најавувајќи една од извршните наредби.
Освен да ги зголемат платите на вработените, Обама ги повика компаниите во САД доброволно да ги изедначат платите на вработените жени со тие на мажите. Обама состојбата со правата на жените на работните места ја спореди со нивната дискриминација во серијата „Мед Мен“ и рече дека „жената заслужува да може да роди дете без да си ја ризикува работата“.
Обама рече дека “Америка не стои во место и нема да стои”. Според него по четири години економски раст “, оние на врвот никогаш не биле во подобра позиција, но за сметка на тоа просечните плати останале исти, нееднаквоста се продлабочила, а мобилноста е во застој.
– Економистите сметаат дека реформа на имигрантскиот систем ќе ја зголеми нашата економија и ќе го намали дефицитот за билион долари во следните две децении. Луѓето доаѓаат тука да ги исполнат своите соништа, да студираат, откриваат работи и придонесуваат кон нашата култура. Ја прават нашата земја поатрактивно место за бизнисите да отворат работни места за сите. Затоа, ајде годинава да ја спроведеме реформата на имиграцијата, изјави Обама.
Американскиот претседател зборуваше малку повеќе од еден час, а во текот на говорот 80-тина пати беше прекинуван со бурен аплауз на демократските конгресмени. Републиканците во најголем дел молчејќи го следеа говорот.
Во врска со Авганистан, Обама најави дека во текот на годината, САД ќе ги повлечат своите сили од оваа земја, ставајќи крај на „најдолгата војна во историјата на САД“. Обама остави можност мал американски контингент да остане во оваа земја, доколку Авганистанците се согласат со тоа.
Од другите надворешно-политички приоритети, Обама накусо се осврна на Сирија, велејќи дека САД ќе работат со меѓународната заедница за крај на теророт во оваа земја, но притоа вети и дека нема да испраќа американски војници во мисии во странство.