Нема скопјанец кој не ја знае жолтата зграда спроти црквата Св. Димитрија на влезот на турската чаршија на која со големи темно црвени букви пишува Дом Ибни Пајко – знакот кој ги чува последните спомени на старото Скопје, односно старото Пајко маало.
Зградата била изградена во 1938, а автор на ова дело е познатиот архитект Михо Чакуља од Дубровник кој потоа се преселил во Скопје каде го поминува целиот животен век. Градена во стилот на архитектот Корбизие и заедно со зграда на Црвениот крст на Македонија и Градската болница ја означуваат модерната во архитектурата во предвоено Скопје.
Оваа зграда името го добила по сопственикот на земјиштето Ибни Пајко, кој бил трговец и затоа на објектот стоеле и буквите со кои е испишано неговото име.
Објектот „Ибни Пајко “денеска
фотографија од Скопје, 1959 на која што се гледа и Пајко Маало
Во 2004 година градот Скопје вложува 500 илјади евра за да ја обнови фасадата на зградата – споменик во Скопје. Многу години пред овој зафат фасадата на зградата била бојадисана со што се прекриле буквите кои претставувале заштитен знак на објектот.
Старата фасада на зградата пред реконструкцијата
-Објектот е од периодот на модерната на Македонија и становите беа за издавање. Тој е прв објект што ја иницира идејата за постоење на плоштад. Покрај тоа што неговата фасада е во црвена боја, има и шрафура која по сегашното бојосување би требало да се запази, забележува архитектот Живко Поповски во интервју за Утрински весник во 2004 непосредно пред стартот на реконструкцијата.
Па, така, најголема грижа на надлежните архитекти при реконструкцијата била да се пронајдат фотографии од првобитната состојба на зграда на која убаво се гледаат преградите во кои во секоја засебно биле сместени буквите за да можат да ги вклучат во изгледот.
Тогаш скопјани ги добиваат назад буквите на зградата симбол на модерната во градот и еден од симболите на старото Скопје. Но, станува се поизвесна опасноста дека и овој објект ќе го „голтне“ барок редизајнирањето на главниот град.
Градот Скопје веќе одбра решение за нова фасада
Која е потребата да се реконструра фасада која била реконструирана пред 9 години и за која што намена веќе се потрошиле половина милион евра од парите на граѓаните? Ова прашање го поставивме во Град Скопје со намера да откриеме дали оваа фасада ќе биде во барок како и останатите згради во централното градско подрачје за кои Советот на градот веќе донесе одлука, а од истиот проект во барок беа реконструирани и зрадите околу плоштадот „Македонија“. Пртпаролот на град Скопје одговори дека нема информација каква ќ биде фасадата, но дека наскоро ќе ни ја обезбеди.