Несомнено бегалската криза периодов достигна невидени размери, но кризата “се крчкаше“ многу поодамна. Според податоците на Меѓународната организација за миграција (ИОМ), 3.200 луѓе загинале во медитеранските води во 2014 година. Во првата половина на 2015 пак, речиси 2.000 ги изгубиле своите животи во водите.
На глобално ниво, до крајот на 2014 година, бројот на луѓе кои поради воените конфликти, протерувањата, или поради прекршување на човековите права биле приморани да ги напуштат своите домови, изнесува 59.5 милиони.
Германија, Унгарија, Франција, Италија и Шведска се земјите кои бегалците најмногу ги посакуваат за свое прибежиште.
Во првите четири месеци во 2015 година, земјите-членки на Унијата пријавиле, севкупно 242.075 барања за азил. Што е за 80 отсто повеќе од истиот период минатата година. Од нив најдрастична промена има во Унгарија.
Се работи за регионална криза, прашањето е само дали ЕУ има волја и ресурси да ја надмине.
Сиријците и Косоварите содржат околу 40 отсто од вкупниот број на баратели на азил во првите четири месеци во 2015.
Германија примила околу 40 отсто од вкупно пресметаните барања во првата третина од 2015 година, додека Унгарија, Франција, Италија и Шведска заедно примиле 39 отсто.
Мнозинството од барателите на азил се мажи на возраст од 18 до 34 години, но значително се зголемувал бројот на малолетници во 2014 година.
Во однос на тоа како стигнувале до земјите, речиси 78 отсто од мигрантите ги поминале морските води, најчесто Сиријци кои се обиделе да поминат преку источниот и централниот дел на Медитеранот. Кон крајот на 2014 година набрзо кризата се прошири на Западен Балкан, каде голготата бегалците ја почнува од Турција, преку Грција, Македонија и Србија за да стигнат до Унгарија, а оттаму во Германија или Австрија.
