Амбасадата на САД ја дели оценката на ОБСЕ/ОДИХР дека се одржале генерално добри избори со некои процедурални нерегуларности, изјави денеска амбасадорот на САД во Македонија Џес Бејли во врска во вчерашните предвремени парламентарни избори.
– Излезноста беше добра, а изборите беа спроведени мирно со неколку процедурални нерегуларности. Ја изразуваме загриженоста на мониторинг тимот на Американската амбасада за административната подготовка на изборите и ја повикуваме идната влада да продолжи да работи на градење на капацитетите на ДИК и да ги разреши структурните и правните прашања кои се однесуваат на Избирачкиот список, изјави Бејли.
Ова, според него е прв чекор кон излез од кризата, а ги охрабри партии кои ќе ја формираат новата влада да работат конструктивно со опозицијата со цел да се обезбедат реформите важни во евроатлантското интегрирање, особено оние од областа на владеењето на правото.
-Она што го покажаа овие избори е дека за граѓаните во Македонија е важно да се приклучат кон ЕУ и НАТО и тоа е обединувачки фактор и тоа ние овде во Амбасадата и во САД ќе го поддржиме, рече Бејли.
На новинарско прашање Бејли истакна дека ќе се воздржат од коментирање на резултатот од изборите бидејќи очекуваат прво ДИК да излезе со прелиминарните резултати за изборите.
Запрашан дали е можно врз резултатот од изборите да влијаат нерегуларностите утврдени од ОБСЕ ако се има предвид дека разликата меѓу двете партии е 15.000 гласа, а бројот на поништени гласачки ливчиња е околу 30.000, американскиот амбасадор изјави дека по завршувањето на гласањето согласно Изборниот законик почнува процес во кој политичките партии можат да покренат прашања за процедурални забелешки.
– Овој процес започнува откако ќе бидат објавени прелиминарните резултати од изборите. Затоа е важно да се дозволи да почне тој процес како што е наведено и во Изборниот законик, а кој исто така е дел од администрирањето на самите избори. Затоа не можам да шпекулирам за резултатот од изборите, рече американскиот амбасадор Бејли.