Владата ќе го испрати деновиве до Собранието законското решение за субвенционирање плати на компаниите, рече денеска министерот за економија Крешник Бектеши. Оваа мерка е дел од четвртиот сет антикризни мерки. Владата ги најави пред три недели, дел од нив не можат да се применуваат поради тоа што не е поминат ребалансот на буџетот, за дел не се усвоени законските измени. Бектеши ги повика сите политички субјекти да не водат дневна политика и во собранието измените да поминуваат брзо. Првата плата што треба да се субвенционираа е таа за октомври. Министерот вели дека ќе се стаса со решението до почетокот на ноември
„Што се однесува до четвртиот сет економски мерки сакам да ги повикам сите политички партии да бидат конструктивни, не треба да се прави дневна политика, заеднички да придонесеме и да им излеземе во пресрет на граѓаните и на фирмите. Јас сум убеден дека навреме ќе почне примената. Бескаматните кредити веќе почнаа, за субвенционирањето на платите овие денови, можеби денеска или утре, ќе го пратиме законското решение во собрание и очекуваме на почетокот на ноември да биде усвоено. За дел од мерките треба да се усвои и ребалансот кој моментно е во собраниска процедура, па да излезе во Службен весник. Ние како Министерство сме ги подготвиле сите јавни повици и имаме можност веднаш да ги објавиме. Затоа ги повикувам сите партии и да ги донесеме решенијата, рече Бектеши.
Во четвртиот пакет предвидени се повеќе мерки меѓу кои и картичките за пензионерите и невработените. Како што е познато, поддршката за исплата на плати до крајот на годината ќе биде скалеста, од 14.500 до 21.776 денари. Таа ќе се однесува на компании кои се погодени од ковид кризата, односно нивните приходи се намалени за 30 и над 30 проценти. Државата ќе ги субвенционира платите на работниците во овие фирми во месеците октомври, ноември и декември, односно до крајот на годината. Со неа Владата очекува дека ќе се поддржат 250.000 работни места, за кои ќе се издвојат 70 милиони евра.