Заканите од глобалната терористичка мрежа Ал Каеда, „креираа“ состанок во Белата куќа на кој се разговараше токму на таа тема, еден ден пред привременото затворање на американски амбасади и конзулати во арапските земји, Израел, Авганистан и Бангладеш, пренесува AFP.
Состанокот со кој претседавала советничката за национална безбедност Сузан Рајс, се одржал во присуство на државниот секретар Џон Кери, министерот за одбрана Чак Хејгел и секретарката за внатрешна безбедност Џенет Наполитано.
Присуствувале и директорите на ЦИА, на ФБИ и НСА.
Американскиот претседател Барак Обама не присуствувал на состанокот на кој требало „исцрпно да се анализира ситуацијата и дополнителните мерки“.
Во петокот „претседателот им нареди на своите соработници задолжени за националната безбедност да ги преземат сите неопходни мерки поради заштита на Американците имајќи ја предвид можната закана која можеби постои или доаѓа од Арапскиот полуостров“, се наведува во соопштението на кое се повикува АФП.
>> Амбасадите се затвораат низ светот- опасност од Ал Каеда
Во четвртокот, портпаролката на американскиот Стејт департмент, Мари Харф изјави дека голем број американски амбасади и конзулати ќе бидат затворени во некои земји, поради безбедносни причини. Таа предупреди дека дипломатските мисии може да останат затворени неколку дена.
Американскиот Стејт департмент во петокот објави предупредување за своите државјани ширум светот да бидат претпазливи бидејќи напади се можни „во прв ред на Блискиот исток и во Северна Африка“, како и на Арапскиот полуостров.
Во недела ќе бидат затворен американските дипломатски мисии во Египет, Ирак, Катар, Бахреин, Авганистан, Бангладеш, Јордан, Оман, Саудиска Арабија, Обединетите Арапски Емирати, Кувајт, Алжир, Јемен и Либија.
Велика Британија, Германија, Франција и Канада, исто така, објавија дека нивните амбасади во јеменската престолнина Сана нема да работат во недела и понеделник, поради веродостојни информации за зголемена опасност од терористички напади врз западни дипломатски мисии.