Белгиската опозиција вчера гo напушти состанокот на парламентот и одби да и поставува прашања на владата во знак на протест поради тоа што не им било дозволено да му постават деликатни прашања на министерот за внатрешни работи.
Групите на социјалистите, еколозите и дел од либералите и демо-христијаните кои се во опозиција одлучија да го напуштат парламентот. Причината за овој, за Белгија невообичаен потег, е скандалот кој вчера избува во ова европско кралство кои од октомври има нова влада составена од франкофонските либерали и уште три партии од холандофонската Фландрија помеѓу кои најголем број гласови (во Фландрија) освои десната националистичка партија НВА.
Според белгискиот печат, министерот за внатрешни работи Јан Јамбон излажал кога рекол дека нема никакви врски со екстремната десница.
Со доаѓањето на новата влада на чело на Белгија во јавноста излегоа информации дека двајца од министрите, за внатрешни работи и за имиграција, имаат тесни врски со екстремната десница. Беа објавен нивни изјави во кои тие двајца покажуваат разбирање на соработката на Фламанците со фашистите во текот на Втората светска војна и забележани се и изјави кои имаат расистички тон.
Јамбон бил сликан на една конференција заедно со Жан-Мари Ле Пен, претседател на екстремно десниот француски Национален фронт. Според првите изјави на Јамбон, станива збор за конференција органзирана од националистичката десница на Фландрија на која, според Јамбон, тој учествувал само како набљудувач.
Но, според медиумите, Јамбон заборавил да прецизира дека бил ко-претседател на овој екстремно десен клуб.
Откако Јамбон одби да одговара на прашањата на опозицијата, таа побара прекин на седницата и итно свикување на конференцијата на претседателите на политичките групи. Но мнознинството во парламентот го одби ова барање.
Според опозицијата ова однесување е тежок удар врз демократијата.
Членови на опозицијата изјавија дека во владата седат луѓе кои имаат врски со екстремната десница. Премиерот Шарл Мишел (либерал) луто реагираше пред новинарите велејќи дека “социјалистичката партија е обидува да оркестрира дестабилизација” и ја осуди “диктататурата на малцинството” во парламентот. Тој рече социјалистите не покажуваат почит кон институциите и се однесуваат “хистерично”.
Ова е веќе втор инцидент во парламентот од доаѓањето на новата влада на власт поради министрите за кои се докажува дека имаат врски со екстремната десница.