Стотици жени во бела облека и со бели рози и други цвеќиња во рацете формираа „жив синџир“ на Плоштадот „Комаровски“ во Минск, во знак на солидарност со повредените за време на протестите во изминатите денови во Белорусија.
Полицијата побара од жените, претежно млади девојки, да се разотидат, што и се случи, но набрзо се вратија на плоштадот. Тие се држат за раце и извикуваат „веруваме, можеме, ќе победиме“.
Протестите во Белорусија почнаа вечерта, на 9 август, откако актуелниот претседател Александар Лукашенко прогласи победа на претседателските избори, а продолжија во понеделникот и во вторникот, при што беа уапсени неколку илјади демонстранти. Едно лице е убиено во обид да фрли експлозивна направа кон полициските сили, но, сепак, експлодирала во неговата рака.
Главниот противник на Лукашенко, Светлана Тихановска, која, според властите освоила 10,09 проценти од гласовите, избега во Литванија. Западните лидери ги осудија насилствата во Белорусија додека Европската Унија (ЕУ) оцени дека изборите не биле ниту слободни, ниту фер.
Над 1.000 приведени и 50 повредени во демонстрациите во Белорусија
Повеќе од 50 лица се повредени во синоќешните протести во Белорусија, соопшти тамошното Министерство за здравство.
„Синоќа се повредени 51 лице и сите се примени во ургентни центри и болници во Белорусија и укажана им е целосна медицинска помош“, се вели во дописот на Министерството за здравство.
Министерството за внатрешни работи на Белорусија, пак, соопшти дека повеќе од 1.000 лица кои учествувале на нелегални демонстрации се приведени во минатата ноќ.
„Во текот на ноќта на 11 август и во утринските часови на 12 август, регистрирани се нелегални собири на граѓани на 25 локации. Повеќе од 1.000 лица кои учествувале во илегални масовни демонстрации беа уапсени и приведени“, се вели во соопштението на полицијата.
Истражните тела покренаа 17 кривични пријави против лица кои учествувале во нападите врз припадници на полицијата, се додава во соопштението на полицијата.