Енормно голем број нерегуларности и прекршувања на изборниот процес регистрирал „Сојузот за иднината“ во општина Битола, информира пратеничката на СДСМ, Весна Бендевска, на прес-конференција.
– Се уште е рано за официјални податоци, но оние неформални резултати добиени од помалите места за нас се крајно позитивни. Во овој момент не сакам да шпекулирам со резултатите, оти истите ќе ги имаме за еден час, но би сакала да ја искористам приликата и да ја информирам јавноста за низата нерегуларности во текот на денешниот и вчерашниот ден. Нашите претпоставки се потврдија: Ова е една од највалканите кампањи што ги има организирано ДПМНЕ. Регистриравме енормно висок број нерегуларности и прекршувања на изборниот процес – рече Бендевска.
Таа извести за низа нерегуларности а посебно алармантно е што голем број гласачи ги немало на избирачкиот список.
– За сите неправилности навремено поднесовме претставки до надлежните институции и набљудувачките мисии. Дел од нив се следните: нарушување на изборен молк, поткупување и потплатување, затекнати лица со избирачки ливчиња надвор од избирачкото место, популарно наречено бугарски воз, нешто што е недозволиво во едно демократско општество. Фантомски гласачи, односно со фиктивна лична карта на место каде што гласачот не живее. Голем дел од нашите традиционални гласачи не се најдоа на избирачкиот список и не го искористија своето избирачко право, како и закани и притисоци врз наши истакнати членови и активисти.
Со оглед на малиот процент обработени податоци, се уште не можеме да утврдиме во колкава мера овие нерегуларности ќе влијаат врз крајниот резултат – порача Бендевска.