Под наслов „Како во некоја диктатура“, германскиот весник „Берлинер цајтунг“ ги портретира случаите со ексразузнавачот Александар Диневски, осуден на 4 и пол години затворска казна за „Шпион“, и последниот случај со прислушувањето кое го обелодени лидерот на СДСМ, Зоран Заев, пренесува „Дојче Веле“.
Во Македонија премиерот Груевски ги отфрли сите задршки во односот со опозиционерите, наведува авторот на текстот Норберт Мапес-Нидек.
Мапес-Нидек поаѓа од случајот со Диневски, кого го означува како „антикорупциски активист“ кој е во истражен затвор од септември 2013 година. Диневски уште во 90-тите години ја напуштил полициската служба „оти веќе не можел да го поднесе постојаното мешање на политичарите во неговата работа“.
Во октомври 2014 е осуден на четири и пол години затвор затоа што, како што пишува авторот, „заедно со поранешниот директор на агенцијата за борба против перење пари собирал документи кои го докажувале плаќањето мито при продажбата на македонскиот Телеком во 2001 година и му ги предал на еден новинар“.
Судот под „криминално здружение“ подразбирал врски со мрежа која е во контакт со претставништвата на ЕУ и ОБСЕ во земјата, како и со полициската мисија на ЕУ „Проксима“. „Кој во борбата против корупцијата доставува информации до властите на ЕУ, очигледно работи за непријателот и мора да смета на соодветно казнување. Во Македонија, земја-кандидат за пристап во ЕУ, во меѓувреме на работите им се приоѓа слично како во Белорусија или Египет“, се констатира во текстот.
Се укажува на 117-тото место на Македонија во однос на слободата на печатот, „зад Конго и Таџикистан, на последно место во Европа, на оваа страна од поранешниот Советски Сојуз“.
Во текстот е наведен и случајот со новинарот Зоран Божиновски, еден од осомничените во аферата „Шпион“, кој беше уапсен во Србија, но тамошниот суд ја усвои неговата жалба и тој го напушти екстрадицискиот притвор каде помина 11 месеци, со обврска на секои 15 дена да се јавува во тамошната полициска станица.
Во однос на лидерот на социјалдемократите Зоран Заев, кој е осомничен за насилство врз највисоките претставници на државните органи и му е одземена патната исправа, во текстот се посочува и на загриженоста на германската влада дека, „покрај неомилените претставници на граѓанското општество, владата атакува и против парламентарната опозиција“.
За еврокомесарот Јоханес Хан се констатира дека „блокира било каква критика на сметка на Македонија“.
„Македонија со катастрофалната положба на човековите права проаѓа толку лесно, оти ЕУ влета во стапица на владата во Скопје“. Тука е наведено дека Комисијата на ЕУ шест години последователно препорачува почеток на пристапни преговори со Македонија, но Грција секогаш става вето поради спорот околу името. „Навистина, препораката на Комисијата од година во година звучи се’ повоздржано, (…) но Брисел не сака да ја повлече. Тогаш имено – тоа се страхувањата – Грција би победила и ЕУ би го загубила целото влијание во Македонија. Во Скопје премиерот Груевски во меѓувреме ја користи таа дилема и дејствува се поотворено во стил на некој диктатор“, се вели покрај другото во написот на „Берлинер цајтунг“.