Вицепремиерот за европски прашања, Фатмир Бесими, денеска во брифингот со новинарите, а последнично и во изјавата информираше дека Секретаријатот за европски прашања (СЕП) веќе ја има направено првичната анализа на Извештајот за напредокот на Македонија доставен од Европската комисија.
– Она што сакам да го истакнам е што исклучително е важно што оваа година се спомнува препораката за отпочнување преговори со Македонија за членство во Унијата. Важно е Република Македонија според содржината во Извештајот, да работи на имплементација на реформите како и на исполнување на политичкиот договор, изјави Бесими притоа одбивајќи да ја коментира самата содржина од Извештајот.
Тој вели многу е важно да се работи на забелешките за понатамошно приближување на земјата.
Бесими рече дека според новиот пристап на оценување од страна на Комисијата и најновиот Извештај за земјава, бил очекуван од страна на Секретаријатот таков каков што е. Според него Македонија, земајќи ги во предвид земјите од Западен Балкан била некаде во средината на напредокот, но длабоката политичка криза се рефлектирала во позицијата на Македонија.
– Условената препорака за нас значи дополнителна мотивација за работа во однос на постигнување на целите за Македонија и во наредниот период да биде во патеката на отворање на преговорите, порача вицепремиерот за европски прашања.
Тој рече и дека недостига конзистентност за да се споредуваат извештаите од минатата година и овогодинешниот, бидејќи бил променет начинот на оценување од страна на Комисијата.
Фатмир Бесими изрази надеж, и рече дека земјава е подготвена и сака да ги започне најтешките поглавја, 23 и 24, кои се однесуваат на владеењето на правото и човековите права, и слободата на изразување, на говор и на медиуми, бидејќи така најлесно ќе се детектираат проблемите и фокусот ќе биде на нив.
СЕП, како што најави, во текот на неделава ќе направи прво читање и со граѓанскиот сектор, а потоа со детална анализа ќе разговара на состанокот на владата врз основа на усогласување на Акцискиот план за Итните реформски приоритети.