Посетата на Грција во својство на заменик претседател на Владата за европски прашања е во функција на создавање клима на соработка, доверба што е од корист за двете страни, вели за МИА вицепремиерот задолжен за европски прашања Фатмир Бесими.
Во интервјуто, Бесими посочува дека главната цел била да се разговара за европската перспектива на земјата пред Самитот на Европскиот совет во јуни, како и да се придонесе за зближување на односите меѓу двете земји.
За прашањето за името, вели дека не било директна тема на разговор.
„Во однос за прашањето за името, кое не е директна тема, но се наметнува во разговорите за европски интеграции, заклучивме заедно дека е потребно што побрзо изнаоѓање на решение прифатливо за двете страни и оти процесот кој се одвива во рамки на ОН со посредство на амбасадорот Нимиц, треба да се забрза до конечно решение“.
Во тој поглед, додава Бесими, „Не треба да има дилема дека има какви било паралелизми“.
Според Бесими, на средбата со грчкиот министер за надворешни работи Димитрис Аврамопулос не станало збор за последниот предлог на медијаторот Нимиц. Тој додава дека не би сакал да прогнозира оптимизам во пресрет на јунскиот самит.