Од средината на Јуни жителите на општина Центар ќе добијат бесплатен паркинг. Ова денеска го најави градоначалникот на општина Центар, Андреј Жерновски заедно со новиот директор на ЈП Паркинзи Центар, Саша Богдановиќ.
„Со ова почнува да се реализира едно од централните ветувања, а тоа е бесплатен паркинг на жителите на Центар на територијата на целата општина“, рече Жерновски.
Директорот Саша Богдановиќ најави дека до средината на месец јуни со службите ќе го операционализира проектот за бесплатен паркинг на жителите на општина Центар.
„До средината на јуни ќе го оствариме проектот за бесплатен паркинг во Центар, без разлика каде живеат граѓаните“, рече Богдановиќ.
На прашањето од новинарите дали можеби се разгледува можноста за поефтино паркирање во општината за оние кои не се жители, со оглед на поплаките на граѓаните на Скопје дека паркингот е прескап за македонскиот стандард, директорот одговори дека е сепак, тоа е неговиот прв работен ден, а за тоа ќе се види понатаму.
Одговарајќи на новинарско прашање дали без да и го врачи отказното решение на претходната директорка назначил нов директор, Жерновски одговори дека тој го потпишал отказното решение, а кога е врачено не е негова работа. Изрази жалење бидејќи поранешната директорка не била на седницата на Советот на општина Центар кога се разгледувал извештајот за работењето на ЈП Паркинзи во претходниот период, кој бил негативен и доцнел.
Бесплатниот паркинг за жителите на општина Центар беше едно од предизборните ветувања на новиот градоначалник на општина Центар.
Новиот директор на ЈП Паркинзи има 28 години и 3,5 години искуство во приватниот сектор.