Започна екстерното тестирање. Од денеска па се до осми јуни, 200.000 основци и средношколци, како и 15.000 професори ќе бидат подложени на екстерно тестирање, чија цел е да се оцени објективноста на професорите при пишувањето оценки на учениците.
Од Бирото за развој на образованието уште еднаш со апел дека учениците не треба да се плашат затоа што ќе полагаат од материјалот кој што веќе го учеле минатата година.
Олеснителна околност е и што децата, компјутерски ќе ги полагаат тестовите и што на секое прашање, од вкупно 30, ќе имаат понудени дури 4 опции на одговор. До крајот на тестот може да се навратат на некој одговор за да го поправат ако се премислат.
Министерот за образование Панче Кралев ги повикува сите ученци што ќе бидат опфатени со екстерното тестирање да ја искорисат оваа можност за да го прикажат своето знаење стекнато во текот на учебната година.
„Верувам дека по завршувањето на периодот на тестирањето сите заедно ќе можеме да ги согледаме неопходните реформи за подобрување на нашиот образвен систем. Апелирам до сите ученици да не се отсуствува неоправдано од тестирањето бидејќи тие ученици нема да добијат свидетелства“, изјави министерот Панче Кралев за Дневник.
Оценките кои ќе ги добие ученикот од двата предмета ќе бидат впишани во сведителството и ќе влијаат на вкупниот успех. Во сведителството ќе стојат и оценките кои ученикот ги добил по тие предмети и од наставникот.