Комитетот за заштита на правата предлага враќање на правдата преку повторување на судските постапки кои биле политички монтирани. Почесниот претседател, Слободан Богоевски кој е осуден во случајот „Агент“ вели дека законот нема да им ги врати годините во притвор на стотиците неправедно осудени, но ќе ја задоволи правдата.
„Сите вие почнувајќи од мене, стално во тој период се прашувавме можна ли е правда во оваа држава, можно ли е враќање на одземените права. Нас никој не може да ни го врати изгубеното здравје, никој не може да ги врати животите на луѓето кои починаа во притвор – затвор или беа пуштени дома да умрат, за да не се расипе статистиката во Управата за извршување на санкциите“, рече Слободан Богоевски – почесен претседател на Комитетот за заштита на правата.
Универзитетските професори Љубомир Фрчковски и Беса Арифи, се согласни дека без расчистување на политички монтираните случаи не можат да се спроведат вистински реформи во судството.
„Најтежок во таа група закони, а тоа е обнова на постапката. Таму се поставува прашање, всушност кои постапки. Сите сметаат секогаш дека се неправедно осудени Тоа е огромен број и постои опасност да се заглавите и да ви пропадне проектот, ако тоа стане огромен број на зони“, рече Љубомир Фрчковски – професор.
„Без наоѓање на правда за тие случаи не може да се каже дека правдата на било кој начин ќе се воспостави во Република Македонија и не може да се воспостави ни довербата кон судството и кон државните органи се додека овие случаи кои што ги знаеме како монтирани случаи на наоѓаат правда“, рече Беса Арифи – професор.
Според нив, извештајот на Прибе укажува на проблемите во правосудството во Македонија и е во линија со реформите кои се подготвуваат за деблокада на судството.
Инаку членови на Комитетот за заштита на правата се осуденици во предметите Шпион, Метастаза, Кампања, Ликвидација, Змиско око и многу други кои велат дека не бараат милост, рехабилитација или амнестија туку пред непристрасен суд да отпочнат нова постапка со која ќе ја докажат правдата.