Наместо да биде опериран на Клиниката за торакална хирургија бездомникот Муарем Демиров кој со полураспаднати стапала шест месеци спиеше пред болниците, бил однесен во Психијатриската болница во Бардовци и во моментот е во многу тешка здравствена состојба, дознава НОВА од свои извори на хируршките клиники.
Лекарски извори од болницата за НОВА велат дека Демиров воопшто не е за кај нив, особено што тие не можат да преземат ништо за да му ги санираат раните на нозете.
Демиров последните денови не е контактибилен, вегетира, а тешка миризба од гангрената се шири во собата каде што е сместен со уште двајца пациенти на интерното одделение во Психијатриската болница во Бардовци.
Дознаваме, дека тој прима терапија за тешки психијатриски болни иако наводно нема таква дијагноза, тој престанал да комуницира и западнал во тешка состојба од гангрената на стапалата која се шири бидејќи не биле санирани раните.
Дека Демиров не бил воопшто опериран потврди и претходниот директор на торакална хирургија Зоран Спировски, кој јавно пред камерите заедно со министерот Таравари ветија дека ќе му биде извршена итна хируршка интервенција. Спировски за НОВА изјави дека Демиров правел проблеми и заради тоа бил префрлен во Психијатриската болница во Бардовци.
„ А, што е важен тој? Зошто за него се интересирате, има толку други работи за кои треба да се интересирате. Кога го донесоа правеше проблеми, фрлаше отпушоци од цигари, ќе на ја запалеше клиниката. Не сакаше да биде опериран, како да го оперираме ако не сака“, изјави за НОВА Спировски.
Сепак, лекарски извори од хируршките клиники за НОВА велат дека Демиров не бил опериран поради тоа што инфекцијата ќе се прошири во операционата сала и во другите простории. Според информациите до кои дојде НОВА, наместо да биде опериран тој на 7 јуни со возило на Итната медицинска помош бил однесен во Психијатриската болница во Бардовци. Еден период, пред да биде донесен на торакална хирургија тој престојувал во Чичино село, но и во Геронтолошкиот завод каде бил донесен од торакална хирургија со образложение дека клиниката се реновира.
„Кај нас имало два приема на пациентот. Првиот е од Градската хируршка болница на 19 април и откога е констатирано дека е избеган затвореник биле известени во затворот Идризово, по што тие го преземале. Вториот прием е од 09.05 до 21.05 кога бил донесен од Клиника за торакална хирургија со образложение дека клиниката се реновира. Од тука избегал на 21 мај , пријавено е во полиција но, во меѓувреме на него му завршила затворската казна. Каде завршил потоа не знаеме. Тоа е се што стои во неговото досие. Тој е поранешен алкохоличар кој веќе не конзумира алкохол, но бил проблематичен“, изјави Салија Бекир новата директорка на Геронтолошкиот завод.
Не е познато како Демиров избегал од Геронтолошкиот завод кога не може да се движи со распаднати стапала од гангрена која ја добил од смрзнатините од студот и како потоа стигнал во Психијатриската болница во Бардовци.
Нејасно е и зошто институциите си ја префрлале топката една на друга.
Во Министерството за здравство не знаат што се случува сега со овој 47 годишен бездомник.
За потсетување, два дена откако беше пронајден како спие пред болницата „8 Септември“, а медиумите ја објавија сторијата, министерот Таравари излезе јавно на 5 јуни и соопшти дека Демиров е во сигурни раце, дека ќе биде опериран и дека целата ситуација е под контрола.
Нема одговор ниту од директорот на болницата Ќамил Ковачи и стручната директорка Анета Ордевска, зошто Демиров е сместен токму во Психијатриската болница во Бардовци ако не е за таму, особено што во оваа здравствена установа не се во можност да му се пружат медицинска помош за гангрената на стапала. И двајцата денеска не одговараа на телефонските повици.