Минимална плата од 18.000 денари ќе има по заедничка одлука на сите социјални партнери во рамки на трипартитниот дијалог. Дали одлуката ќе биде 18.000 денари или повеќе тоа ќе биде заедничка одлука на сите социјални партнери, истакна потпретседателот на СДСМ, Фатмир Битиќи во емисијата „Топ тема“ на ТВ Телма.
Тој нагласи дека секое едно важно решение за работниците, но и за работодавачите, ќе добие соодветен позитивен одговор за двете страни само преку Економско-социјалниот совет и преку дијалог на социјалните партнери.
Едностраните, ултимативни решенија не се конструктивни во таков дијалог, кој што сакаме да го воведеме во новото општество во кое што креиравме дијалог и консензус околу битни прашања на сите чинители, а тоа се социјалните партнери, нагласи Битиќи, додавајќи дека не треба да се вратиме шест години наназад, кога сите до еден реагираа на едностраниот начин на кој владата постапуваше во нашето општество.
„Пред десетина дена имавме состанок со претседателот на ССМ, за три дена состанок ќе има на кој треба да зборуваме за минималната плата, колективните договори, регресот во јавниот сектор и други прашања кои ги постави синдикатот“, рече Битиќи.
Тој нагласи дека барањето на синдикатот не се однесува само на зголемување на минималната плата, туку и на зголемување на уделот на минималната плата во просечната плата.
Во декември 2016 година, уделот на минималната во просечната плата бил 38 отсто, а во декември 2021 година тој нараснал на 52 отсто.