Македонија е дел од жирито на најстариот светски филмски фестивал „Мостра“ во Венеција што се одржува од 27 август до 7 септември преку присуството на филмскиот критичар Благоја Куновски.
На Куновски ова му е четврти пат како е дел од жирито на Федерацијата на филмска критика – Фипресци. Покрај него, во шестчленото жири се и ветеранот на британската филмска критика и критичар на лондонските весници Гардиан и Ивнинг Стандард-Дерек Малколм, потоа Ева Пејдро од Шпанија, Јон Асп од Шведска како и двајцата италијански претставници, критичарите Кјара Тоњолоти и Серџио ди Џорџо.
Жирито има за задача да ја додели наградата за најдобар филм од главната конкуренција, но и за најдобрите филмови од паралелните програми, Хоризонти и за најдобар дебитантски филм од Неделата на критиката.
На отворањето на фестивалот се прикажа првиот од 20-те селектирани филмови од најновата светска филмска продукција-Птичарот – на латиноамериканскиот режисер Алехандро Гонзалес Инариту кој е во трката за Златниот лав на Венеција.
Инаку, Куновски е долгогодишен уметнички директор и селектор на Главната Компетиција на фестивалот Браќа Манаки.