Во 2013 година со 791 милион и 406 илијади денари или близу 13 милиони евра од Буџетот ќе се финансираат издавачка дејност и литература, филмски фестивали, електронско издаваштво, фолкорна и сценско-уметничка-дејност, национални установи, музичко сценска дејност, музејска дејност, библиотеки, центри за култура, организации од областа на културата, инвестициско и техничко одржување на објекти и опрема за културата во државна сопственост, потоа сектор за меѓународна соработка и соработка со УНЕСКО и други корисници.
Македонската опера добила средства за премиерите на оперите „Фауст“, „Хофманови приказни“, „Атила“, „Свирачот на покривот“.
Во Македонски народен театар од Скопје премиери се „Мајсторот и Маргарита“ во режија Иван Поповски,„Сина птица“ во режија Златко Славенски, „Вујко Вања“, режија Зоја Бузалковска, „Неподнослива тешкотија на умирањето“ ‐ автор Ана Ристоска, режија Нела Витошевиќ.
Во Драмски театар ќе се подготвуваат премиерите: „Кирил и Методиј си одат дома“ од Горан Стефановски во режија на Александар Поповски, „Чија си“ во режија Љупчо Ѓорѓиевски, „Живот во тесни чевли“ од Душан Ковачевиќ во режија Ненад
Витанов и „Евридика“ во режија Нина Николиќ.
Во битолскиот театар ќе режираат Никита Миливојевиќ, Ѕвезда Ангеловска, Мартин Кочовски и Сашо Миленковски. Во Театарот за деца и млади Владимир Милчин ќе ја постави претставата „Нашиот клас“. Две претстави ќе поставува режисерот Срѓан Јанаќијевиќ – во Турски театар и во Театарот за деца и млади.
Инаку, сите институции од културата и издавачки куќи добиле средства за финансирање на нивната годишна програма според одлуките на комисиите на Министерството.
Вкупниот буџетот за 2013 година на Министерството за култура е 3.561.447.000 денари и е 19,1 проценти поголем од минатогодишниот кој изнесуваше 2.989.616.000 денари. Програмските средства од годинашниот буџет се во висина од 791.460.000 или близу 13 милиони евра и во однос на 2012, кога изнесуваа 762.764.000 денари, се поголеми за 3,7 отсто.
Во издавачката дејност се поддржани 489 проекти (313 дела, 83 преводи, 15 електронски изданија, 37 програмски активности на здруженија, пет манифестации) од 1.320 пријавени.
Од областа на драмската дејност, во програмата за 2013 година се поддржани 101 проект: 44 се на професионалните театри (43 премиери и едно гостување), 18 независни и алтернативни проекти во девет општини, 20 фестивали и манифестации во 12 општини и 19 аматерски претстави во 17 општини.
Покрај 13-те театарски фестивали кои досега добиваа поддршка од Министерството за култура, годинава ќе бидат поддржани и три нови фестивали – „Битола Шекспир фестивал“, во организација на Народен театар-Битола, Театарски фестивал за деца и младинци „Малиот принц“ во Штип, кој ќе го организира НУ Центар за култура „Ацо Шопов“ од Штип, Интернационален детски фестивал „Сонот на облачето“ во Скопје, во организација на Граѓанската асоцијација за мултимедијална театарска уметност, креативност и култура „Сенки и облаци“, како и Фестивалот на хумор и сатира „Ин Виница веритас“ на Домот на култура „Тошо Арсов“ од Виница.
Во Програмата се опфатени и субвенционираните проекти од музичко-сценска, музејска, ликовна и галериска, библиотечна дејност, проекти од заштитата на културното наследство, меѓународна соработка…
Од буџетот за 2013-та се предвидени средства за меѓународна презентација – Третата верска конференција во Охрид, претставување на македонската култура во Марсеј, кој е европска престолнина на културата, одржување на Денови на македонската култура во Шведска и во Холандија, претставување на Биеналето на ликовни уметници во Венеција и за други меѓународни активности.
Оваа година е најавено отворање на Стариот театар во Скопје, а ќе продолжат и активностите за изградба или реконструкција и санација на објектите на неколку национални установи од културата.