Пакетот што се подготвува се состои од неколку фази. Првата фаза, според изворите, би вклучувала зајакнување на украинската армија преку обука и засилување. Овие сили потоа би биле поддржани од мултинационална група составена главно од европски трупи, при што Велика Британија и Франција се подготвени да испратат стотици свои трупи. Тие би биле стационирани во Украина, но подалеку од линиите на фронтот.
Се очекува пакетот за безбедносни гаранции за Украина да биде финализиран оваа недела откако американскиот претседател Доналд Трамп поддржа план што вклучува испраќање европски војници како дел од евентуален мировен договор, објави Блумберг. Европските лидери сега се обидуваат да ја искористат понудата на Трамп за да го стават Кијив во подобра преговарачка позиција пред потенцијалната средба меѓу претседателите Владимир Путин и Володимир Зеленски.
По самитот во Белата куќа во понеделникот, кој донесе посилна поддршка од САД за гаранциите, европските претставници вчера се фокусираа на доработка на планот. Според извори запознаени со ситуацијата, планот вклучува испраќање британски и француски војници во Украина, а нивниот број и распоред се дискутирани. Десетици земји се подготвени да ги испратат своите сили во земјата разорена од војна, изјавија изворите за Блумберг под услов на анонимност.
И покрај напредокот, природата на поддршката од САД останува нејасна. Трамп изјави за Фокс њуз: „Кога станува збор за безбедноста, тие се подготвени да испратат луѓе на терен. Ние сме подготвени да им помогнеме со некои работи. Веројатно би можеле да разговараме за воздушна поддршка бидејќи никој нема опрема каква што имаме ние, тие навистина немаат. Не мислам дека тоа ќе биде проблем.“
Подоцна, портпаролката на Белата куќа, Керолин Левит, рече дека Трамп разбира дека гаранциите се „клучни за обезбедување траен мир“.
-Тој му наложи на својот тим за национална безбедност да се координира со нашите пријатели во Европа и да продолжи да работи и да ги дискутира овие прашања со Украина и Русија, рече Левит. Таа додаде дека Трамп ја исклучил можноста за испраќање американски трупи на терен, но дека Вашингтон „секако би можел да помогне во координацијата и можеби да обезбеди други средства за безбедносни гаранции“.
Британската влада вчера потврди дека европските воени претставници ќе се сретнат со своите американски колеги во наредните денови за да разработат „силни безбедносни гаранции и да се подготват за распоредување на сили за да се обезбеди стабилност во случај на прекин на непријателствата“. Во разговорите ќе учествуваат и Врховниот командант на сојузничките сили на НАТО за Европа, Алексус Грегори Гринкевич, и шефовите на одбраната на земјите-членки.
Претседателот на Европскиот совет, Антонио Кошта, изјави во Лисабон дека условите за гаранциите ќе бидат договорени „во наредните денови, можеби оваа недела“. Иако европските лидери го гледаат состанокот во Белата куќа како пресвртница, некои официјални лица остануваат скептични во врска со можноста за постигнување мировен договор и дали гаранциите ќе бидат доволни за да го одвратат Путин.
Од друга страна, Кремљ, кој бара Кијив да ја отстапи контролата врз големи делови од источна Украина, ја отфрли можноста трупите на НАТО да бидат присутни на украинска територија.
Пакетот што се подготвува се состои од неколку фази. Првата фаза, според изворите, би вклучувала зајакнување на украинската армија преку обука и засилување. Овие сили потоа би биле поддржани од мултинационална група составена главно од европски трупи, при што Велика Британија и Франција се подготвени да испратат стотици свои трупи. Тие би биле стационирани во Украина, но подалеку од линиите на фронтот.
Следната фаза од планот вклучува и таканаречена логистичка поддршка од САД, што би вклучувало споделување разузнавачки информации, надзор на границите, снабдување со оружје и евентуално воздушна одбрана. Европските претставници очекуваат САД да продолжат да обезбедуваат разузнавачка и воена опрема преку европските партнери.
Италијанската премиерка Џорџа Мелони предложи безбедносни гаранции за Украина по примерот на НАТО, што би му дало на Кијив силна сојузничка поддршка без формално членство во алијансата. Таа потврди во понеделникот во Вашингтон дека ова е еден од предлозите што ќе се дискутираат.