Буџетот на Министерството за транспорт и врски за 2022 година е проектиран на 11,865 милијарди денари, од кои 10,885 милијарди денари се за капитални инвестиции или околу 91,7 отсто. Таргетот што се сака да се постигне со овие средства е да се обезбеди високо ниво на реализација на проектите од патната и комуналната инфраструктура, натаму од гасната област и железницата, изјави Бочварски во рамките на денешната прес конференција.
Силна заложба , рече Бочварски е да не се дозволи да забават активностите на пан-европските коридори.
– Капитален проект на кој ќе посветиме големо внимание е изградба на железницата кон Бугарија. Силен фокус даваме на доизградба на автопатските делници на коридорите 8 и 10 д, а изградбата на магистралните гасоводи остануваат приоритет и за следната година.
Изградба на локални улици и патишта, изградбата на брана на река Отиња во Штип, изградба на инфраструктура за брз автобуски превоз низ градот, а продолжува и проектот за финансиска поддршка на нови авиолинии, се се овие проекти и области кои ги наведе Бочварски врз кои ќе биде ставен фокусот на реализација за наредната година.