Пратеникот на СДСМ Павле Богоевски од собраниската говорница денеска презентираше фотографија од, како што рече, сметката за мобилен телефон на поранешниот премиер, сега пратеник и претседател на ВМРО ДПМНЕ Никола Груевски од над 184.000 денари за роаминг што ја плаќа Владата на РМ.
Богоевски говореше за големиот број реплики и контрареплики со кои се блокира работата на Собранието и се одвлекува дебатата за точките од дневниот ред – избор на составот на Комисијата за прашања на избори и именувања и за избор на претседател на Собранието.
– Проблемот е што со таквото блокирање не го криете само криминалот направен пред објавување на бомбите, Пржино 1 и Пржино 2 или пред изборите. Криете криминал што се уште се прави, по започнувањето на продолжението на оваа седница, рече Богоевски.
Тој покажа фотографија од документ, кој според него е увид во состојбата на сметката на службениот мобилен телефон на Груевски, за која рече дека не тврди дека е вистинита, но побара тоа службите да го проверат.
– Овде пишува дека од службениот премиерски телефон што го плаќа Владата на РМ во периодот од 1 март до 1 април 2017 година е направена сметка од над 184.000 денари за роаминг. Дали тоа значи дека државата го плаќа она што ви го праќаше Никола Груевски од Малта за цикрузот тука? , праша Богоевски.