Најавите за зголемување на каматните стапки за кредитите – гувернерот на Народната банка ги нарече дезинформации. Богов во интервју за Радио Слободна Европа, вели дека кога пред пратениците зборувал за зголемување на каматите, всушност објаснувал хипотетичка ситуација, во случај политичката криза да продолжи, а не дека кажал дека веднаш ќе се посегне по зголемување на каматите.
-Таа негативна спирала ќе почне да се врти, уште помалку инвестиции, уште помала потрошувачка, нема создавање на нови работни места, можно е да дојде до намалување на платите и влегуваме во една спирала којашто многу веројатно во еден период, тоа нема да се случи денеска или утре, меѓутоа во втората половина на годината веќе ќе имаме ситуација кога македонската економија би се соочила со рецесија, нормално ако продолжи оваа политичка неизвесност или уште ако ескалира.
Во таква ситуација, може да дојде во прашање и ценовната стабилност. Искуството во Македонија покажува дека секогаш кога има рецесија обично има и притисоци врз макроекономската стабилност. Во таква ситуација, Народната банка, според закон, има обврска да ја одржи ценовната стабилност и стабилноста на банкарскиот систем. Инструментите коишто нам ни стојат на располагање се каматните стапки, задолжителната резерва, макропрудентните мерки.
Ние ќе го преземеме она што мора да го преземеме за да ја зачуваме стабилноста во една таква хипотетичка ситуација. Она што беше пренесено, беше пренесено дека гувернерот уште утре ќе ги зголеми каматите, што е сосема различно од она што беше кажано, рече Богов.