Јавното обвинителство отвора истрага против Бојан Јовановски познат како Боки 13 и Зоран Милески познат како Зоки Кичеец, за примање награда за противправно влијание и за перење пари.  За двајцата се бара притвор.

Обвинителството водело предистрага за овие две лица од 2 мај годинава, а прибраните вербални и материјални докази веќе се основ за да се поведе истрага – рекоа на прес конференција во Јавното обвинителство. Случајот во обвинителство го пријавило лице кое сега е сведок во постапката.

Првоосомничениот Бојан Јовановски од ноември 2018 до април 2019 искористувајќи го своето влијание врз јавен обвинител ветувал дека ќе запре истражна постапка која се водела против  сведокот. Двајцата осомничени неколкупати се сретнувале со сведокот во неговиот дом и во домот на првоосомничениот, а контакти имало и преку сопругата на сведокот.

На средбите осомничените го уверувале севдокот дека  имаат влијание врз обвинител и дека можат да ја запрат постапката или да му обезбедат олеснителни околности. Оосмничените примиле и пари како награда за посредувањето во висина од 1,5 милиони евра.

Според обвинителката Вилма Рускоска „осомничените прво побарале  8.000.000 евра за да се запре истражната постапка, а доколку таа не биде запрена, тогаш во насока на изнаоѓање на олеснителни околности, сведокот требал да им исплати 5.000.000 евра, со тоа што веќе дадените 1.000.000 во вториот наврат влегувале во тој износ. Останатите 4.000.000 евра било договорено да се исплаќаат суксесивно на четири месечни рати“.

Кога Јовановски се посомневал дека може да се води истрага и против него, ги прекинал сите контакти со сведокот.

Тој е осомничен и за перење пари затоа што претходно примените пари од кривичното дело ги пуштил во оптек како легално стекнати пари и со нив купувал предмети, облека и уплаќал одмори, суми кои драстично ги надминувале неговите приходи.

За второосомничениот се уште се води финансиска истрага, каде ги трошел парите.

Обвинителката Рускоска рече дека во овој случај биле применети мерки следење.

Јавниот обвинител на кој се повикувале осомничените не е повикан на распит, но не е исклучено истрагата да се прошири и за други лица.

„Во овој случај две лица се осомничени за тргување со влијание да се запре постапката што ја водел обвинител. Друго е прашањето дали ветувањата се оствариле или не“ рече Јовески, додавајќи дека „истрагата продолжува за да се утврди кој се е оштетен и кој се влијаел“.

Обвинителите повикаа да се пријават и другите оштетени лица на кои двајцата осомничени им ветувале дека преку јавен обвинител ќе им ја олеснат запретената казна.

Од Обвинителството не го откриваат името на обвинителот, но Јовески рече дека него не го штити имунитет.

На новинарско прашање, дали денешната оставка на шефицата на СЈО Катица Јанева има врска со случајот, Јовески рече дека тоа е нејзин личен чин и натаму не можат да коментираат.

me>