Заштитната опрема за медицинскиот персонал сега е централизирана, под клуч бидејќи земал кој како ќе стигне за свои блиски во банки, продавници, шалтери
Во Медицинскиот центар во Дебар има заштитна опрема за медицинскиот персонал и таа е доволна за 4 до 5 дена. Ова за НОВА го потврди доктор Миле Босилковски, професор и инфектолог од Инфективната клиника во Скопје кој се наоѓа во Дебар, жариштето на епидемијата. Тој денеска бил во Кризниот штаб и лично да има соопштил дека за медицинскиот персонал има заштитна опрема доволна за неколку дена и дека нема потреба да се крева паника.
Неговата реакција доаѓа по вчерашната изјава на Хекуран Дука, градоначалник на Дебар и одговорен во Кризниот штаб кој апелираше до Владата итно да се обезбеди поголема заштита за здравствените работници во општината.
„Бев денес во Кризниот штаб и им соопштив дека нема потреба да се крева паника ниту меѓу медицинскиот персонал ниту меѓу граѓаните. Заштитна опрема имаме доволно најмалку за четири дена. Имаме маски, капи, заштитни наочари, хируршки ракавици, заштитни престилки, добивме и околу 50 скафандери. Таа опрема не е во аптеката туку е централизирана за да се има контрола во трошењето“, изјави Босилковски за НОВА.
Како што дознаваме, претходно немало контрола како се троши затитната опрема, па секој си земал како ќе стигнел, преку врски за потребите на своите блиски во банки, шалтери, продавници. Сега на ваков начин, потенцираат од болницата, се води строга контрола како с е троши медицинскиот материјал кој е наменет исккучиво за медицинскиот персонал.
Во медицинскиот центар во Дебар кој денеска е зајакнат со уште еден пулмолог и педијатар од Скопје, сомнителните случаи се закажуваат и во тие неколку часа се прегледуваат што повеќе пациенти и им се земаат брисеви. Заболените откако ќе се докажат со тестирање, во зависност од тежината на состојбата се праќаат на Инфективната клиника во Скопје или остануваат во Дебар.
Во Дебар веќе три медицински сестри и двајца доктори се заразени со коронавирусот, но тие се од приватна здравствена установа. Вчера министерот Филипче посочи дека концесионерите и приватните лекари треба сами да си обезбедат заштитна опрема затоа што не се во државно здравство, туку концесионери.
Босилковски вели дека доколку правилно се употребува заштитната опрема нема потреба од стравување за зараза на медицинскиот персонал.
Професорот Босилковски, самиот се пријави да помогне во кризниот регион во Дебар и го даде на располагање сето свое знаење и моќ, за да помогне во жариштето на епидемијата каде што најпрво беше прогласена вонредна состојба. Градот е блокиран и во него никој не може да влезе и излезе, освен возилата за доур на храна и лекови.