По навршени 20 години од премиерата на „Пред дождот“ македонскиот режисер Милчо Манчевски е и добитник на овогодинешната награда за „Големата ѕвезда на македонскиот филм“ од Друштвото на филмски професионалци на Република Македонија.
Во рамките на 35-тото издание на фестивалот „Браќа Манаки“во Битола, Манчевски ќе одржи јавен разговор со гледачите кои ќе имаат можност да разговараат лично со единствениот македонски добитник на Златен лав во Венеција и кандидат за Оскар во категоријата најдобар филм од неанглиско говорно подрачје.
На настанот ќе биде присутна и Лабина Митевска, една од актерките во филмот, а најавено е и доаѓањето на Раде Шербеџија.
35-тото издание на „Браќа Манаки“ ќе се одржи од 13 до 19 септември. Годинава ѕвезда на фестивалот е француската актерка и оскаровка Жулиет Бинош, а во склоп на фестивалот ќе се прикажат вкупно 76 филма меѓу кои и омажот на Милчо Манчевски.