Александар Стојаноски, братот на жената која попладнево загина по пад од зграда заедно со нејзината малолетна ќерка, вели дека неговата сестра и внуката минувале низ пекол предизвикан од таткото на девојчето
Жителите на Тафталиџе, на Скопје и на целата држава попладнево беа потресени од веста за страшна трагедија – мајка и девојче, нејзината малолетна ќерка, загинаа во пад од голема височина од станбена зграда. Александар Стојаноски, брат и вујко на жртвите, вечерва на социјалните мрежи напиша „денес се случи убиство“, откривајќи дека сестрата и внуката со години трпеле страотно семејно насилство од партнерот и татко на девојчето.
Стојаноски обвинува дека државата, институциите, службите… не успеале да го запрат насилството и да ја спречат трагедијата. Тој вели дека ќе се бори докрај за правдата за неговата сестра и за внуката.
Иако ми е тешко, сакам да се обратам во име на моето семејство, денес се случи убиство. Денес потфрли МВР, Социјалните служби, денес потфрли целиот наш систем … После години на пријавувано семејно насилство, физичко и психичко насилство врз двете, закани, пријавувања, обид за убиство во сред државна институција, ги загубив внуката и сестрата. Државата овозможи да згаснат млади животи, ве молам да не шпекулирате што се случило, никој нема да ми ги врати најмилите, но правдата ќе мора да се истера до крај и нема да запреме додека не се случи тоа! Со оглед на тоа што и покрај сите пријави и случувања, институциите не постапија до сега, барам фокус од јавноста и медиумите за ова, нема да дозволиме да помине само како бројка, правдата мора да го стигне секој еден!, напиша Стојаноски во објавата
Тој открива и дека неговата сестра денес требало да оди на средба со социјални работници, токму поради постојаното насилство, психичко и физичко, кое го трпеле таа и нејзината ќерка од насилникот.
„Сестра ми денес требала повторно да иде во социјално, за сите овие работи, а со внуката се слушнавме за Прочка, ми рече – вујче прости ми ако сум ти згрешила нешто … вујчино, прости ми ти, прости на овие неспособни институции, а јас вујче, нема никогаш да простам и да заборавам. Споделете, да не се заборави и изгуби низ нашиот систем!, пишува Стојаноски во потресната објава.
Жители на зградата во која живееле мајката и ќерката на социјалните мрежи пишуваат дека биле сведоци на постојаното насилство што врз сопствената сопруга и ќерка го вршел насилникот, кој според нив често бил пијан.
Истрагата треба да ги открие точните околности под кои се случи ужасната трагедија во Тафталиџе.