Одлуката на мнозинството граѓани на Велика Британија, кои на референдумот изгласаа земјата да ја напушти Европската Унија, политичките партии во Македонија ја толкуваат различно. Иако сите во своите платформи припишуваат посветеност за приближување на земјата во европската заедница, во земјата сепак се чувствува и антиЕУ расположение.
НОВА ги праша за став четирите најголеми политички партии во земјава кои со посредство на ЕУ и САД во повеќе наврати седнаа на заедничка маса со цел да се најде решение за излез од политичката криза во земјава.
Ставот на владејачката партија е дека одлуката на Британија треба да се почитува, а нејзиното влијание врз Македонците, одговорот најпрецизно ќе го дадат анкетите во иднина, односно народот.
-Станува збор за одлука на Британците и британските даночни обврзници која мора да се почитува. Единствено што можеме ние е да им посакаме успех на патот кој го избрале. Европската Унија губи значајна членка која даваше свој придонес во процесот на проширување на Унијата. Во однос на расположението на народот во Македонија и влијанието на Брегзит, ќе видиме, тоа наскоро сигурно ќе го покажат и анкетите, непринципиелно е да се коментира сега, вели портпаролот на владејачката партија Иво Котевски во изјава за НОВА.
Од СДСМ сметаат дека ЕУ е патот по кој треба да се движи Македонија.
-Ја делиме загриженоста којашто постои кај сите земји членки на Унијата, по референдумот во Британија. Особено што Македонија загуби една од земјите коишто беа силни поддржувачи на проширувањето. Како земја-претседавач со ЕУ, Британија силно го поддржа кандидатскиот статус на Македонија. Веруваме дека брзо ќе се изнајдат решенија за надминување на предизвиците. Социјалдемократскиот сојуз, како и огромното мнозинство граѓани во земјава, е убеден дека европските вредности и интегративните процеси што градат мостови меѓу граѓаните, народите и нациите се клучни за подобра и сигурна иднината на Македонија. Патот по којшто треба да се движи земјава е патот кон полноправно членство во Унијата, велат од најголемата опозициска партија СДСМ.
Долгогодишниот вицепремиер за евроинтеграции Фатмир Бесими, кој беше сменет од функција по бранот на нови министри од редовите на ДУИ, вели дека европската агенда и реформите во Македонија мора да продолжат.
-Брегзит е одлука на мнозинството гласачи во Велика Британија и како таква треба да се почитува, иако во оваа прилика сепак е важно да се потенцира дека 48 отсто Британци гласаа за да останат во Европската Унија. ЕУ треба да продолжи со изразено единство за остварување на мировниот проект, и во исто време да работи на справување со сите предизвици. За Македонија, ЕУ останува стратешка определба и интерес,како економски – така политички и безбедносен. Европската агенда и реформите во Македонија мора да продолжат и тие се во интерес на граѓаните на Република, вели Бесими за НОВА.
Од ДПА денеска не беа достапни за коментар.
Последната антиевропска порака во Македонија, беше испратена на масовниот собир на Граѓанското движење за одбрана на Македонија (ГДОМ) на кои претставуваа високи функционери од владејачката ВМРО-ДПМНЕ.
„Не во Нато“, „Амбасадорите ви се грди“, „Не во ЕУ“ и слично – ова беа белезите на собирот на ГДОМ, за подоцна, по лавината реакции во јавноста, од движењето да реагираат дека наводно биле подметнати.
Според Јове Кекеновски од ФРОДЕМ, владејачката партија иако јавно се залага за ЕУ, сепак преку своите медиумите и движења, пропагира сосема поинакво расположение.
-Се чувствува некое антиЕУ расположение, кое дел од граѓаните со радост го прифаќаат, но сметам дека одлуката на Британија нема да има некакви последици врз Македонија. Би било лошо, доколку тој пример го следат и другит членки, но верувам дека нема да биде така. Доколку се засили тоа, тогаш би требало партиите уште поодлучно да ги истакнат своите статути и платформи, бидејќи не знам некоја партија што не го споменува влезот во ЕУ во своите политики. Од друга страна, се забележува некакво лицемерие кај власта, бидејќи наметнува антиевропско расположение по провладините медиуми, што е очигледно, а од друга страна вели дека останува посветена на тоа Македонија да стане членка на европската заедница. Допрва ќе видиме што се случува, смета Кекеновски.
Македонија се најде и во антиЕУ кампањата на британските партии кои беа за напуштање на Унијата. Кампањата се содржеше во тоа што балканските земји меѓу кои беше наведена и Македонија се претставени како „лошо друштво“ во Европа.
Како што пишува Њујорк Тајмс, Брегзит дава јасен знак дека големите демократии се неверојатно ранливи под влијание на популистичките политички движења кои обожаваат да ги демонизираат имигрантите и надворешните сили. Првите последици веќе се забележуваат – гласањето во Британија ги прати светските пазари на диво паѓање.
-Неколку експерти очекуваат дека излегувањето на Британија ќе создаде финансиска криза слична по онаа на колапсот на банкарскиот џин „Lehman Brothers“ во 2008-та година. Но никој не може ниту да го исклучи тоа. Светот никогаш не бил овде претходно, пишува Њујорк Тајмс.