МЗТ Скопје Аеродром со брејк ја почна финалната серија за пополнување на АБА лигата. „Штрковите“ славеа на гостувањето кај Задар со 89:83 (по четвртини: 30:18, 27:18, 22:25, 10:22) и се најдоа на чекор до враќање во елитното регионално кошаркарско друштво за што им треба уште една победа.
Аеродромци, кои загубија од Приморска во плејоф финалето во АБА 2 лигата, овојпат одиграа фантастично прво полувреме во салата „Крешимир Ќосиќ“ во кое го трасираа патот до конечен триумф.
Андрија Бојиќ беше најефикасен во составот на Ѓорѓи Кочов пришто најголема поддршка имаше од Џејмс Вудард. Српскиот крилен центар постигна 24 коша што ги збогати со девет скока одека Американецот заврши со 19 поени. Лука Божиќ, пак, беше прв стрелец кај домашните кои на моменти беа исвиркани од своите навивачи што не успеаја да се вратат во игра по негативата од воведниот дел на средбата.
Вториот натпревар од серијата меѓу МЗТ Скопје Аеродром и Задар е на 23 април во 18 часот во Скопје, а евентуалната мајсторка е на 30 април од 17 часот на брегот на Јадранот.