Како ќе продолжи Македонија по европскиот пат кога датумот за преговори за членство станува далечна перспектива?
Ова е накусо прашањето на кое денес во Брисел се обидоа да одговорат комесарот за проширување Штефан Филе и неговите двајца македонски соговорници министрите за надворешни работи Никола Попоски и за европска интеграција Фатмир Бесими.
Тројцата соговорници не излегоа пред новинарите за да одговорат на прашања но соопштение за средбата испрати комесарот Филе. Според него, како што е вообичаено, разговорот се водел околу реформите во Македонија како и можноста да се продолжи со Високиот пристапен дијалог (ВПД) кој е алатка за да се поддржи напредокот на земјата на патот кон ЕУ. Овој ВПД започна пред скоро две години и досега и помогна на Македонија да остане на европскиот пат и да добива позитивни годишни извештаи за своите реформи.
Според Европската комисија (ЕК) овој ВПД ќе продолжи и ќе биде зајакнат во периодот пред следниот годишен извештај на ЕК предвиден за есента 2014 година «за да се напредува на патот на ЕУ интеграцијата», вели кабинетот на Филе.
Од своите денешни македонски гости Филе барал исто така да се примени договорот од 1 март и клучните реформи како што се «слободата на изразувањето, судската независност и изборното законодавство», ги набројува приоритетите соопштението од кабинетот на Филе.
Конечно, Попоски, Бесими и Филе разговарале и за добрососедските односи и «потребата за да се биде во постојан напор за да се гради доверба и да се создадат услови за решенија», вели ЕК мислејќи на македонските односи со Грција и Бугарија за кои Брисел чека чекори кои би воделе кон нивно решавање.