Средбата помеѓу македонските лидери, комесарот Хан и европскиот пратеник Иво Вајгл која започна утринава во 11.30 часот досега не може да се нарече успешна но може да ја носи придавката интензивна.
На разговорите присуствуваат и амбасадорите на ЕУ и САД во Македонија Орав и Бејли.
Според дипломатски извор кој ги следи преговорите во Брисел, на масата е предлог за техничка влада и повлекување на Никола Груевски од премиерската позиција три месеци пред април 2016 година, времето на договорените идни предвремени избори. Во тој предлог има и понуда која вели дека влијанието на Груевски во тој предизборен период би било минимално без детали за тоа што тоа “минимално влијание” подразбира.
Истиот извор тврди дека двете страни цврсто стојат на своите позиции.
СДСМ смета, како што вели дипломатскиот извор, дека периодот од три месеци е прекус за да се воведе нов систем кој би можел да организира фер и слободни избори. Оставката на Груевски е првото барање на опозицијата од кое, како што сме информирани, таа не отстапува додека Груевски од своја страна не сака да ги напушти премиерското место пред крајот на оваа година.
Според нашите информации, комесарот Јоханес Хан инсистира вечерва да се дојде до договор и неговата примена да почне што е можно побрзо. Но, лидерот на опозицијата, како што изјави утринава, смета дека не треба да се брза.
Од сите присутни на средбата само лидерот на опозицијата даде изјава при влегувањето на состанокот во која тој го повтори својот став дека тој нема да отстапи од барањето за преодна влада во која нема да има место Никола Груевски.
– Се надевам дека денеска ќе сфати Европската Комисија. Ако и денеска не сфати, можеби после 10 дена ќе сфати, или после 20, но апсолутно немаме кај да брзаме. Знаеме дека е важно да добиеме позитивна препорака од ЕК, но пред се, и над се, мора да имаме слободна и демократска земја, додаде Заев.
Лидерот на ВМРО-ДПМНЕ не даде изјава и не е сосема јасно кои се барањата на владеачката партија освен тоа што се согласиле за избори во април 2016 година како што беше договорено во Скопје на 2 јуни. Од информациите што пристигнаа од преговорите, Груевски се согласува да се повлече од премиерската функција на три месеци пред предвремените избори.
Утринава Хан на Твитер напиша дека денеска е круцијален ден за политичките лидери на одржлив начин да ја решат политичката криза а непосредно пред стартот на средбата тој изрази надеж дека денеска ќе биде убав ден за иднината на земја.
Последните неофицијални информациите најавуваат дека средбата била прекината помеѓу 21 и 22 часот за да се остави време за вечера. Средбата би можела да трае до доцна во ноќта.
НОВА останува во Европската комисија до крајот на преговорите.