Славица Филиповска
Менче Атанасова Точи
Починатиот Британец немал ебола, покажаа резултатите од лабораторијата во Хамбург. Дополнително ќе се испитува која е причината за смртта.
Од Министерството за здравство соопштија дека врз телото дополнително ќе биде извршена обдукција за да се види од што починал.
Останатите 25 луѓе кои што се наоѓаат под карантин во хотелот во кој што престојувал Британецот и 10-те медицински лица кои беа изолирани на Инфективната клиника веднаш ќе бидат пуштени од карантин.
Надлежните веднаш ја известиле Британската амбасада дека нивниот државјанин немал ебола, а за резултатите известена е и Светската здравствена организација(СЗО)
-На Клиниката за инфективни болести пациентот беше третиран вкупно 45 минути, дека итно е реагирано при неговиот прием и преземени се сите соодветни мерки, согласно клиничката презентација на истата.
Се работи за релативно кратко време и со оглед на покажаните симптоми и клиничката слика кои во тој момент можеа да упатуваат на ебола, пациентот беше со нарушена состојба на свест, асептичен шок, со акутни повраќања, знаци на внатрешно крварење, особено во ситуација на позитивна епидемолошка анкета во тој момент, преземени се сите мерки согласно медицинските протоколи, изјава проф.д-р Звонко Миленковиќ, директор на Клиника за инфективни болести-Скопје.
Телото на починатиот се чуваше во посебна просторија на Инфективната клиника во лимен и дрвен сандак, се додека не се утврди дали бил заболен од смртоносната болест. Починатиот Британец немал крварење од сите делови на телото,како кај еболата, туку внатрешно, што за надлежните сепак, отворило сомнеж дека се работи за смртоносната болест.
-Штом не се работи за инфективна болест, врз телото може да се изврши обдукцијата, соопштија од Комисијата за заразни болести.
Починатиот пациент е бизнисменот Колин Џефри, кој пред неколку години бил прв човек на Советот за странски инвеститори во Македонија, поранешен директор за стратегиски планирања во „Џонсон Мети“.
Неговиот пријател кој до овој момент беше во карантин, е Мајкл Инглиш и бил советник во македонската Влада. Неговата сопруга за англиските медиуми изјави дека не знае од што починал Џефри, но дека е сигурна дека не починал од ебола.
Претходно се огласи и англискиот Завод за јавно здравје, од каде што тврдеа дека смртта на Британецот во хотел во Македонија не е предизвикана од ебола и покрај симптомите кои предизвикаа паника кај народот овде.
-Британскиот Завод за јавно здравје е свесен дека постои непотврден извештај за британски државјанин кој почина во Македонија, кој можеби имал слични симптоми на ебола. Ние сметаме дека е малку веројатно ебола да е причина за смртта, но ќе ја продолжиме соработката со партнерите во истрагата, изјави доктор Брајан Меклоски од Заводот за јавно здравје на Англија, пренесе „Индепендент“.
Сомнителниот случај на ебола ја смести Македонија на насловните страни во светските медиуми. Во земјата има многу странски новинарски екипи кои ги будно ги следат случувањата со сомнителниот случај.