Итно мора да се завршат случаите покренати од поранешното Специјално јавно обвинителство, истакна вечерва американската амбасадорка, Кејт Мари Брнз, во ексклузивно интервју за ТВ21.
Таа нагласи:
– Сметам дека искуството и, особено тоа што уште има случаи од поранешното СЈО кои се во системот, покажува дека луѓето сакаат правда. Сакаат случаите да поминат низ системот, да бидат обработени од способни професионалци, без политичко мешање и со конечно решение со кое ќе се одреди одговорноста за криминалот што ќе се докаже дека бил извршен, вели Кејт Мари Брнз.
Амбасадорката додава дека увиделе дека итно мора да се завршат случаите од поранешната канцеларија на Специјалниот јавен обвинител, да се обработат во системот и да се види правда во тие случаи.
– Видовме, исто така, според подоцнежниот закон за јавното обвинителство, дека има потреба процесите да се разгледаат и да согледаме како се управува со позициите и со процесите за да бидеме сигурни дека случаите ќе се придвижат низ системот без политички влијанија. Сѐ уште сме соочени со тежок предизвик, ама има многу луѓе кои се фокусирани и сакаат да го направат системот функционален, порача Мари Брнз во ексклузивното интервју.
Таа нагласи и дека „треба да се одреди каде постои корупција и потоа да се справиме со неа“.
Во секоја држава, според Брнз, мора да постои национално решение, но постојат и начини за соработка како можност да се внесат најдобрите практики и заедничката експертиза кои, како што вели, ќе ни помогнат меѓусебно да се поддржиме и да се справиме со прашањата.
– Во Северна Македонија се гледа многу динамична дискусија за корупцијата и опасноста од корупција на секое ниво. Би рекла дека тоа е сигнал дека вашата демократија е жива и силна. Секако, справувањето со корупцијата е тешко и напорно и нема да Ве лажам. На демократиите им треба постојано внимание. Бараат постојана работа, особено кога се работи за дел од овие проблеми, кои се поврзани со интересите на некои луѓе и културолошките пракси кои мора да се променат. Но, сметам дека е важно што имате многу гласно и енергично граѓанско општество и НВО-сектор, коишто ја присилуваат Владата да одговори на дел од овие прашања. Тоа е огромно барање, а луѓето бараат резултати и дејствување, порача Брнз.