Борко Стефановиќ, претседателот на Левица на Србија и еден од основачите на Сојузот за Србија, Бобан Јовановиќ и Марко Димиќ, активисти на Левица на Србија, се брутално претепани пред одржувањето на трибината на Сојузот на Србија во Крушевац, соопштија медиумите во Србија, а потврди српскиот опозициски сојуз.
Српската полиција соопшти дека веднаш по настанот излегла на лице место и дека се преземени сите мерки за да се најде и идентификува напаѓачот, и дека за сѐ е информирано надлежното обвинителство.
Напаѓачите, вооружени со железни прачки го пресретнале Стефановиќ, го турнале на асфалтот и безмилосно го удирале по лицето и главата, а кога на помош му притрчале Јовановиќ и Димиќ, „напаѓачите се нафрлиле и врз нив“, истакнува Сојузот.
Од Сојузот за Србија јавија дека поради потешки повреди на главата Борко Стефановиќ бил префрлен во Ургентен центар , Јовановиќ му биле искршени два заба и расечена устата, додека Димиќ добил повеќе удари во главата.