Бугарското Народно собрание денес едногласно ја усвои декларацијата за Договорот за пријателство, добрососедство и соработка со Република Македонија, јавува БГНЕС. Гласаа “за” 206 пратеници, немаше ниту еден глас против ниту пак воздржани.
Премиерот Бојко Борисов им се заблагодари на пратениците по гласањето.
Народното собрание на Бугарија позитивно ги оценува напорите на двете влади за финализирање на преговорите за договорот за добрососедство. И се подвлекува желбата на Бугарија за натамошен развој на добрососедството и пријателството помеѓу Република Бугарија и Република Македонија, потребата од развој на соработка во сите области на основата на меѓусебно почитување, доверба, разбирање и почитување на интересите на двете земји, желбата за интензивирање на економските и културните врски и блиски контакти меѓу граѓаните.
Подвлечено е исто така дека европската перспектива на Македонија е гаранција за безбедноста, стабилноста и просперитетот на регионот.
Бугарскиот Парламент изразува подготвеност да ги почне процедурите за ратификација на Договорот во најкус рок по неговото потпишување.