Денеска Албанците кажаа „да“ за меѓуетничката консензуалност како концепт во Република Македонија и кажаа „не“ на едностраното владеење односно на едностраниот претседател, денеска триумфираше идејата на ДУИ, изјави портпаролот на ДУИ, Бујар Османи на вечерашната партиска прес-конференција во Мала Речица.
– Нашата цел беше таа идеја да остане жива. Ние не се повлекуваме од таа идеја се до нејзината конечна реализација со плебисцитарната поддршка што ја добивме денеска добивме ветер во нашите едра да продолжиме и понатаму се до нејзина конечна реализација, нагласи Османи.
Тој посочи дека денеска нивниот политички ривал ДПА доби помалку од 35.000 гласови.
– Тоа е помалку од 10 проценти од нивната желба да имаат 350.000 гласови или помалку од 40 проценти од гласовите што ги имаа минатата година на локалните избори. Тоа е заради тоа што оваа иницијатива на ДУИ е надпартиска. Беше национална иницијатива за промоврање на улогата на Албанците во владењето, бидејќи Рамковниот договор не предвидува само учество на Албанците, туку учество во донесувањето на одлуките, потенцира Османи.
Денеска во албанскиот политички блок немаше натпревар меѓу двајца кандидати за претседател, туку имаше референдум за една идеја.
– Идејата беше поставена пред граѓаните Албанци. Дали консензуалноста, меѓуетничката консензуалност е единствено решение за Република Македонија и за нејзината иднина, рече Османи.