Пратеничката на СДСМ, Љубица Буралиева, откако одби да даде оставка во Парламентот и да ја следи политичката одлука на опозицијата за бојкот, за НОВА изјави дека не знае дали и е прифатено и официјално повлекувањето на оставката.
Буралиева, која вели дека во моментов не се наоѓа во Скопје, заради што комунициравме со СМС пораки, изјави дека не била вчера на седница затоа што бојкотира, како останатите пратеници на СДСМ:
– Бојкотирам како и сите други кои вчера си останаа пратеници, како јас и Солза (Грчева) со плата- 33 пратеници. Нивниот статус по ништо не се разликува од нашиот во моментов.
Можеби треба да ги прашате нив како останаат пратеници, покрај “бојкотот”.
Буралиева не даде одговор на нашето прашање зошто смета дека е во иста ситуација како другите пратеници од СДСМ, кога Вељановски ја одложи седницата и со тоа и прифаќањето на оставките, додека таа претходно ја повлекла сопствената оставка.
Освен тоа, таа изјави и дека не е известена за ставот на СДСМ дека ќе биде исклучена, ниту дека ја слушнала вчерашната прес-конференција на портпаролот Петре Шилегов на која тој се повика на Статутот на партијата, каде се регулирани причините за исклучување од партијата на одреден член.
Љубица Буралиева, заедно со Солза Грчева од СДСМ и Роза Топузовска, ЛДП, се трите претставнички на опозицијата кои објавија дека нема да ја следат политиката на партиите за бојкот на Парламентот после непризнавањето на изборните резултати.
Двете партии ги именуваа за кандидатки на изборните листи, според кои тие и ги добија пратеничките места.
На денот на изборите, веднаш по затворањето на гласачките места, Заев, како лидер на опозицијата, во штабот на СДСМ објави дека не ги признаваат резултатите, образложувајќи дека е грубо фалсификувана волјата на граѓаните, заради што побара формирање на техничка влада која би спровела слободни и фер избори.