Центарот за граѓански комуникации денеска ги објави резултатите од мониторингот на постапките за јавни набавки во Македонија, во првото полугодие од 2015 година.
Еден од клучни наоди од мониторингот на постапките за јавни набавки, според мониторингот е ниското ниво на конкуренција, со што, како што наведуваат од Центрот „се доведува во прашање ефективноста во трошењето на јавните пари“.
Втората констатација е дека Советот за јавни набавки, основан за да ја зголеми конкуренцијата, досега не дал резултати. До Советот за јавни набавки во првото полугодие од годинава се доставени 10.362 барања за согласност, што ги чинело институциите дури 74,3 милиони денари односно 1,2 милиони евра.
Мониторингот на Центарот за граѓански комуникации, кој заедно со Фондацијата Отворено општество Македонија, Младинскиот образовен форум, Реактор – Истражување во акција и Форум – Центар за стратегиски истражувања и документација го спроведуваа проектот на УСАИД за граѓанско општество, регистрирал дека воведената контрола ги дисциплинирала институциите и ги принудила да го намалат користењето на нетранспарентната постапка со преговарање без претходно објавување на оглас. Така, во првото полугодие од годинава, вредноста на овие договори изнесува околу 11,5 милиони евра и е за 61,4% помала од истиот период лани.
– Во првото полугодие од 2015 година поништени се 18,5% од огласените тендери. Со ова е забележан благ пад на бројот на поништувања на тендерите во однос на претходните периоди, а во истиот период фирмите доставиле и најмал број на жалби во изминатите неколку години. Односно, вкупно до Државна комисија за жалби по јавни набавки се доставени 252 жалби, што е за дури 23,6% помалку од истиот период лани. Повеќе од половина од жалбите се доставени од фирми кои ги оспоруваат донесените одлуки за избор на најповолна понуда во тендерите, се наведува во мониторингот на Центарот за граѓански комуникации на постапките за јавни набавки во Македонија, во првото полугодие од 2015 година.