Полицијата повторно се пресметува со демонстрантите со водени топови, солзавец и гумени куршуми во најголемите турски градови Анкара, Истанбул и Измир.
Како што јавуваат светските медиуми гневот на народот го разгорел фактот што полицијата лажела за причините за смртта на 22-годишниот демонстрант.
Откако полицијата јави дека паднал од зградата од која демонстрантите ја гаѓале полицијата со камења, обдукциските наоди потврдиле дека на телото немало фрактури кои би укажувале на пад од зграда. Сведоците тврдат дека во главата го удрила лименка од полициски солзавец.
Се поголем е бројот на оние што се против политиката на премиерот Реџеп Таип Ердоган.
Цензурата е во полн замав и при известувањата за реалната состојба во Турција – Ердоган се погрижил турските медиуми да не известуваат од протестите.
Вестите за реалната состојба во Турција до остатокот од светот стигнуваат „капка по капка“, само благодарение на социјалните мрежи и известувачите за странските медиуми кои не се подложни на цензура.